Zemaj për 36 vdekjet si pasojë e COVID-19: Po të ishte veç një ëndërr do të ishte e frikshme

“Po të ishte veç një ëndërr do të ishte e frikshme, por është më shumë se aq, është e vërtetë”.

Kështu e ka nisur reagimin ish-ministri i Shëndetësisë, Armend Zemaj, pasi të dielën u raportuan 36 viktima si pasojë e COVID-19.

“36 jetë u ndalën para kohe, 36 familje humbën më të dashurit e tyre, 36 kufoma do të barten për në banesën e fundit. Mijëra ëndrra dhe plane të 36 njerëzve tanë sot u shuan, ato do të zëvendësohen me mijëra lutje ndaj Zotit për shpirtin e tyre”, ka shkruar Zemaj në Facebook.

Deputeti i Lidhjes Demokratike të Kosovës shtoi se “një ditë si kjo është e rëndë”.

“Zemra ime në këto çaste është me ata që ndërruan jetë, ndërsa shpirti im me familjet e tyre”.

Një rekord prej 36 viktimash nga Coronavirusi është shënuar brenda 24 orëve të fundit në Kosovë, njofton Shqip.com.

Si asnjëherë më parë, numri i të vdekurve si pasojë e infektimit me virusin Corona në Kosovë ka kaluar në mbi 35.

Kështu është bërë e ditur në njoftimin e fundit të Ministrisë së Shëndetësisë, ku thuhet se edhe një mijë e 630 qytetarë kanë rezultuar pozitivë me COVID-19.

Rastet e reja të infektimit janë regjistruar nga gjithsej 11 mijë e 17 testime të kryera.

Tutje në raport njoftohet se sot janë shëruar 816 qytetarë, derisa numri i përgjithshëm i të shëruarve është 113.699, derisa numri i rasteve aktive në total është 26.575.

Në 24 orët e fundit janë dhënë 11.458 doza të vaksinës kundër COVID-19.

Prej fillimit të vaksinimit në të gjitha qytetet e Kosovës janë dhënë 808.078 doza të vaksinës. Deri më sot 269.312 qytetarë janë vaksinuar me dozën e dytë.

Kryeministri i Kosovës, Albin Kurti, do të thërras mbledhje urgjente të Këshillit të Sigurisë Kombëtare këtë pasdite, si pasojë e situatës me COVID-19.

“Sot pasdite kryeministri Kurti do të thërras mbledhje urgjente të Këshillit të Sigurisë Kombëtare të Kosovës”, thuhet në komunikatën e kryeministrisë, teksa ora e mbledhjes nuk është bërë ende e ditur. /Shqip.com