Zelensky takohet me senatorët amerikanë

Presidenti ukrainas, Volodymyr Zelensky, u takua të premten në Kiev me kryetarin e Komisionit të Senatit të Shteteve të Bashkuara për Shërbimet e Armatosura, Jack Reed, dhe një anëtar të këtij Komiteti, Senatorin Angus King.

Gjatë takimit, Zelensky tha se e sheh propozimin rus për një “armëpushim” 36-orësh si një “manipulim me të cilin agresori përpiqet të fshehë planet dhe synimet e tij të vërteta ushtarake”.

Pas takimit në një konferencë për gazetarët, Reed deklaroi se ai i tha Zelenskit se sakrifica e tij dhe e vendit të tij ka frymëzuar botën dhe “se ata po luftojnë për të gjithë ne”.

Ai tha se njoftimi i Presidentit Joe Biden për mbështetje shtesë ushtarake, të tilla si mjetet luftarake Bradley, do t’u japë forcave ukrainase “aftësinë për të thyer vijën e frontit, për të shfrytëzuar atë përparim dhe për të vazhduar, ne shpresojmë që, të dëbojnë rusët nga territori ukrainas”.

I pyetur nga Scott McLean i CNN nëse dërgimi i Bradley Fighting Vehicles do t’i hapte derën SHBA-së për dërgimin e tankeve M-1 Abrams, Reed tha se nuk kishte asnjë lidhje.

Ai tha se është gjithmonë i shqetësuar për rezervat amerikane të armëve dhe pajisjeve dhe kjo shkon në vendimet e Pentagonit se çfarë të dërgojë.

King u shpreh se ata patën një “ditë të jashtëzakonshme” në Kiev, pasi ai vuri në dukje “guximin, përkushtimin” e popullit ukrainas.

Ai tha se ata po e vizitonin sepse “kjo është një luftë për ne, për të gjithë botën, për vlerat e lirisë dhe demokracisë – dhe kjo është arsyeja pse ky angazhim është i nevojshëm”.

“Historia thotë se diktatorët priren të shtyjnë dyert e hapura dhe nëse gjejnë dyer të hapura, ata do të vazhdojnë. Nëse dikush pyet pse është e nevojshme kjo luftë, gjithçka që duhet të bëjë është të shikojë prapa në vitin 1938 dhe Sudetenland, 1936 dhe Rheinland, kur Lufta e Dytë Botërore mund të ishte parandaluar nga lloji i rezistencës që po ndodh pikërisht këtu sot”, shtoi King, shkruajnë mediat e huaja.

I pyetur se çfarë tjetër do t’i dërgojnë Shtetet e Bashkuara Ukrainës për t’i dhënë fund luftës këtë vit, King tha se Amerika do të vazhdojë të mbështesë Ukrainën dhe pas takimit me zyrtarët në Kiev ata “u larguan me një listë”.

Reed theksoi se ai ishte “frymëzuar” për të “përshpejtuar ndihmën që i duhet Ukrainës për të përfunduar këtë luftë”.

Ai shtoi se SHBA-ja kishte marrë një angazhim të madh dhe se do të priste një njoftim të mëtejshëm së shpejti. King deklaroi se trajnimi për sistemin raketor mbrojtës Patriot që dërgohet në Ukrainë “do të fillojë së shpejti”, por kohëzgjatja e trajnimit është e klasifikuar.