William Walker nderohet me titullin “Doctor Honoris Causa”

Ambasadori William Walker është nderuar me titullin “Doctor Honoris Causa” nga Universiteti “Haxhi Zeka” në Pejë.

Pjesë e kësaj ceremonie është edhe kryeministri i vendit, Albin Kurti, ministrja e Arsimit, Arbërie Nagavci e shumë ministra të tjerë.

Kryeministri i vendit, Albin Kurti, sot deklaroi se ambasadori William Walker para se të jetë mik i Kosovës, është mik i së vërtetës.

Ai tha se misioni verifikues i OSBE-së ndihmoi në ndryshimin e perceptimit ndërkombëtar për UÇK-në.

Sipas tij, diplomati amerikan me deklaratat e tij ka bërë jehonë për masakrën e Reçakut, duke e vlerësuar si krim kundër njerëzimit.

“Në janar të vitit 1999, policia e Serbisë e rrethekoi fshatin Reçak. Ata vranë e masakruan trupat e 45 banorëve… Asgjë nuk e ka ndryshuar rrjedhën e ngjarjeve se sa jehona e masakrës në Reçak siç ishte raportuar nga ambasadori William Walker. Para se të jetë mik i Kosovës, është mik i së vërtetës”, kështu tha ai në ceremoninë e Universitetit “Haxhi Zeka” për ndarjen e gradës së doktorit.

Tutje, Kurti tha se Walker është vërtet një mik i Kosovës.

“Në këtë pikë, ambasadori Walker është miku im që nga koha e luftës e deri më sot në Pejë. Më 1998 ai erdhi në Kosovë, ky mision ishte lehtësisht i identifikueshëm me veturat ngjyrë protokolli”, u shpreh ai.

Rektori Armand Krasniqi tha se deklaratet e ish-shefit të misionit të OSBE-së pas masakrës në Reçak ka bërë kthesë në historinë e Kosovës.

“Sa herë që kujtojmë dhe flasim për ju, me mendje e zemër përherë i përulemi kontributit tuaj në historinë e Kosovës. Fjalët e tuaja të thëna pas masakrës së Reçakut, për juve ishte përmbushje e misionit që ju besua nga misioner ndërkombëtare dhe për shqiptarët shënon një kthesë”, u shpreh ai.