Vonohet lansimi i Apple Vision Pro

Në edicionin e fundit të buletinit të Mark Gurman’s Power On për Bloomberg, është thënë se Apple kishte planifikuar që kufjet Apple Vision Pro do të dalin në janar të vitit 2024.

Megjithatë, kompania është ende duke përgatitur planet e shpërndarjes për produktin dhe duke bërë testimin përfundimtar të pajisjes.

Apple ka thënë zyrtarisht se Vision Pro do të dalë në shitje në fillim të vitit të ardhshëm në Shtetet e Bashkuara, por Gurman thotë se tani pret që pajisja të debutojë “diku rreth marsit”.

Apple Vision Pro do të lansohet fillimisht në Shtetet e Bashkuara, me disponueshmëri në vende të tjera më vonë në vitin 2024.

Gjiganti amerikan pritet ta shesë pajisjen në dyqanet e shitjes me pakicë ose në ueb, përmes dyqanit online të Apple.

Pajisja nuk do të jetë e disponueshme për shitësit me pakicë të palëve të treta, pasi Apple dëshiron që me kujdes ta bëjë përvojën e prezantimit për platformën e saj të re.

Nëse vendoset përfundimisht muaji mars, Apple pritet që të zhvillojë një tjetër ngjarje mediatike në pranverë.

Kjo do t’i japë Apple një mundësi tjetër për të paraqitur kufjet prej 3499 dollarësh për klientët dhe për të treguar disa aplikacione dhe veçori që nuk ishin plotësisht të gatshme për demonstrim në zbulimin e WWDC në qershor.