Vela: Kryetarët e komunave me shumicë serbe tradhtuan qytetarët e tyre

Shefi i Stafit të Presidentes së Kosovës, Blerim Vela ka thënë se kryetarët e katër Komunave me shumicë serbe në Kosovë të cilët sot dhanë dorëheqje kanë tradhtuar qytetarët e tyre.

Përmes një postimi në Twitter, Vela tha se strukturat ilegale serbe në Kosovë kurrë nuk do të jenë përfaqësues legjitim të serbëve në Kosovë.

“Strukturat e paligjshme të Serbisë në Kosovë nuk janë dhe kurrë nuk do të jenë përfaqësues legjitim i serbeve të Kosovës, Vetëm zgjedhjet sipas Kushtetutës dhe ligjeve prodhojnë përfaqësim ligjorë dhe legjitim. Kryetarët e katër komunave të cilët dhanë dorëheqje, tradhtuan qytetarët e tyre”, shkroi Vela.

Kujtojmë se Qeveria e Kosovës ka marrë vendim që deri me 21 nëntor të bëjë qortimin ndaj shoferëve të cilët vozisin automjete me targa të lëshuara nga autoritetet e Serbisë e që cilësohen ilegale në Kosovë.

Pas datës 21 për të vazhduar deri me 21 janar është masa për shqiptimin e gjobave ndaj këtyre shoferëve. Për dy muaj të tjerë do të ketë tabela testuese si dhe lehtësira në regjistrim deri me 21 mars por, pas kësaj date nuk do të ketë më lehtësira.

Data 21 prill e vitit të ardhshme shënon afatin e fundit që lejon qarkullimin e automjeteve me targa ilegale Brenda territorit të Kosovës.

Shtetet e Bashkuara të Amerikës patën kërkuar nga Kosova shtyrje të afatit për targa por kjo kërkesë nuk u merr parasysh.

Të njëjtën linjë me SHBA-në qëndron edhe Bashkimi Evropian – Ata e quajnë legjitim vendimin për targa por thonë se kjo duhet të  bëhej Brenda një periudhe kohore prej 12 muajsh.

Kjo situatë ka ndikuar edhe në gjendjen në veri të Kosovës – Qeveria ka pezulluar drejtorin e Policisë Rajonale në Veri Nenad Gjuriq për shkak se nuk e zbatonte vendimin për qortim ndaj qytetarëve serb.

Në shenjë proteste, Lista Serbe ka kërkuar që të gjithë serbët të bojkotojnë institucionet e Kosovës. Pjesëtarët e Policisë së Kosovës kanë zhveshur dje uniformat e tyre.

Nga detyra e ministrit të Kosovës ka dhënë dorëheqje edhe Goran Rakiq, ndërsa gjatë ditës së sotme kësaj ju janë bashkuar edhe katër kryetarët e komunave me shumicë serbe.

Sot gjatë ditës është mbajtur edhe një protestë në veri, nga e cila u kërkua formimi i Asociacionit të Komunave me Shumicë Serbe.