Vajza që dyshohet se u dhunua nga pesë persona është e mitur, në rast i përfshirë edhe një i mitur
Vajza e cila është raportuar se gjatë ditës së djeshme është dhunuar nga pesë persona në Prishtinë, është e mitur.
Këtë e ka konfirmuar për Shqip.com zëdhënësja e Prokurorisë Themelore në Prishtinë, Laureta Ulaj e cila tha se lidhur me rastin janë ndaluar dy persona.
Sipas Ulajt, njëri prej personave të ndaluar është i moshës së mitur.
“Viktima është e mitur. Lidhur me rastin janë ndaluar dy persona dhe njëri prej të ndaluarve është i moshës madhore kurse tjetri është i mitur”, tha Ulaj.
Tutje, Ulaj tha se sa i përket këtij rasti janë duke u ndërmarrë të gjitha veprimet e duhura hetimore në bashkëpunim me institucionet e tjera si dhe janë duke pritur për zhvillime.
Sipas raportit 24 orësh të Policisë së Kosovës, të dielën një vajzë ka raportuar se pesë persona e kanë dhunuar në Prishtinë.
Ndërsa, sipas Policisë, pas intervistimit viktima është dërguar në strehimore.
“Ankuesja femër kosovare ka raportuar se pesë persona të dyshuar kanë kryer veprën e lartcekur ndaj viktimës femër kosovare. Lidhur me rastin pas intervistimit viktima është dërguar në strehimore”, thuhet në njoftimin e PK-së.
Kurse, PK-ja e ka cilësuar rastin si “Dhunim”./Shqip.com
