Tronditet Big Brother VIP, banori arrestohet nga policia brenda shtëpisë

E pazakontë ajo që ka ndodhur brenda shtëpisë më të famshme në Shqipëri. Banori i ri Liam Osmani i cili hyri mbrëmjen e kaluar është arrestuar brenda shtëpisë së Big Brother VIP.

Sipas deklaratës nga Policia e Tiranës, Osmani, 44 vjeç, akuzohet për mashtrim.

Njoftimi i Policisë së Tiranës

Strukturat e Forcës së Posaçme për Operacionet Speciale dhe Kërkimin bënë ndalimin e shtetasit Liam Osmani, 44 vjeç, teksa ai ndodhej në shtëpinë e Big Brother Albania Vip 3.

Prokuroria e Tiranës, më datë 09.05.2022, ka dërguar urdhërin për ekzekutimin e vendimit penal të datës 23.02.2022, për dënimin e këtij shtetasi me 2 vjet e 6 muaj burgim për veprën penale “Mashtrimi”.

Ky shtetas, në vitin 2019, nëpërmjet mashtrimit, ka përvetësuar 17 bileta turistike për në Gjermani, për të cilat nuk ka kryer pagesat përkatëse.

Materialet i kaluan Prokurorisë pranë Gjykatës Shkallës së Parë të Juridiksionit të Përgjithshëm Tiranë, për veprime të mëtejshme procedurale.