Tërmeti i ri në Turqi lë tre të vdekur dhe njerëz të bllokuar nën rrënoja në Hatay

Tre persona tani thuhet se kanë vdekur pas një tërmeti me magnitudë 6.4 që goditi Turqinë jugore të hënën, disa javë pasi një tërmet vdekjeprurës shkatërroi rajonin.

Ministri i Brendshëm Süleyman Soylu tha gjithashtu se 213 persona ishin plagosur.

Agjencia turke e fatkeqësive dhe emergjencave Afad tha se tërmeti ndodhi në orën 20:04 me kohën lokale (17:04 GMT).

Një tërmet me magnitudë 7.8 goditi të njëjtën zonë më 6 shkurt, duke vrarë më shumë se 44,000 njerëz në Turqi dhe Siri.

Të vrarët nga lëkundjet e së hënës u gjetën në Antakya, Defne dhe Samandagi, tha Soylu, duke u bërë thirrje njerëzve të mos hyjnë në ndërtesa potencialisht të rrezikshme.

Tërmeti i së hënës goditi në afërsi të kufirit Turqi-Siri dhe grupi i mbrojtjes civile të Helmetave të Bardha tha se më shumë se 100 njerëz u plagosën në Siri, me ndërtesa të shembura dhe panik të përhapur.

Fondacioni i Shoqërisë Mjekësore Siriane Amerikane tha se pesë nga spitalet e tij morën të paktën 30 persona me lëndime nga tërmeti i fundit, por shtoi se dëmet në objektet e saj mjekësore “duket të jenë minimale”.

Mësohet se tërmeti është ndjerë edhe në Egjipt dhe Liban.

Në Turqi ka frikë dhe panik teksa vazhdojnë të vijnë pasgoditje të vogla. Linjat e ambulancave dhe ekuipazheve të shpëtimit po përpiqen të arrijnë në disa nga zonat më të prekura, ku muret e ndërtesave të dëmtuara rëndë janë shembur.

Një numër strukturash që mbetën në këmbë pas lëkundjes së 6 shkurtit tani janë shembur, duke përfshirë një urë. Shumë çarje në rrugë janë bërë plagë të thella duke e bërë më të vështirë për shërbimet e urgjencës të arrijnë atje ku mund të nevojiten, raporton BBC.