Sveçla: Lojërat e Vuçiqit po vazhdojnë, duan ta mohojnë sulmin ndaj KFOR-it
Ministri i Ministrisë së Punëve të Brendshme të Kosovës, Xhelal Sveçla ka thënë se lojërat e presidentit të Serbisë, Aleksandër Vuçiq lidhur me situatën në veri të Kosovës janë duke vazhduar.
Përmes një postimi në Facebook, Sveçla ka thënë se sulmin ndaj KFOR-it në veri, Serbia po mundohet ta mohojë.
“Lojërat e Vuçiqit dhe instrumenteve të tij kriminale po vazhdojnë. Fillimisht deklaruan se në Zubin Potok ka pasur përleshje të armatosura të iniciuara nga Policia e Kosovës dhe Njësitë e saj Speciale. Mirëpo, kur e kuptuan se bandat kriminale të mbështetura nga vet ai kanë sulmuar KFOR-in, duan t’i mohojnë të gjitha sulmet. Barrikadat duhet të hiqen menjëherë. Serbia duhet të ndalojë organizimin dhe mbështetjen e strukturave kriminale ilegale që duan të destabilizojnë Republikën e Kosovës”.
Sveçla tha se Policia e Kosovës do të vazhdojë ta luaj rolin e saj dhe ta përmbush misionin që ka.
“Policia e Kosovës do të vazhdojë të luaj rolin e saj dhe përmbushë misionin e vet. Bëj thirrje tek të gjithë qytetarët që të mos bijën pre e propagandës së Serbisë për të nxitur një konflikt të ri dhe të bashkëpunojnë me Policinë dhe organet e rendit”.
Kujtojmë se mbrëmjen e djeshme edhe vetë KFOR-i ka konfirmuar të shtënat me armë zjarri në afërsi të patrullës së tyre.
Por, nga këto të shtëna nuk atë lënduar dhe as dëme materiale.
Kujtojmë se veriu i vendit është në tensione të vazhdueshme që nga data 6 dhjetor ndërsa, me arrestimin e ish-policit, Dejan Pantiq, serbët lokal vendosën barrikada atje.
Sipas raportimeve, tek barrikadat ka edhe njerëz të armatosur.
/Shqip.com