Sulmohet ekipi i “Kohës” në Zveçan

Është sulmuar me gurë ekipi i Kohavisionit i cili po i përcillte zhvillimet në Zveçan.

Siç raporton “Koha”, turma prej 30-40 protestuesish, disa prej të cilëve më maska në fytyrë, e kanë sulmuar veturën në lëvizje të KOHËS duke hedhur gurë dhe duke ia thyer xhamat, me ç‘rast shoferi ia ka dalë të mbrohet e ta kalojë këtë situatë pa lëndime.

“Gazetarja dhe kameramani gjatë asaj kohe kanë qenë disa metra më larg duke përcjellë zhvillimet, e siç ka treguar shoferi i KOHËS, ngjarja ka ndodhur derisa aty kanë qenë të pranishëm edhe pjesëtarë të Policisë së Kosovës”, shkruan “Koha”.

“Shoferi ka vazhduar tutje dhe kur ka hasur në patrullën e Policisë së Kosovës, ku edhe ka pasur prani të mediave të tjera që janë interesuar për rastin, policët i kanë kërkuar që të largohet nga aty, duke mos u interesuar për gjendjen e tij dhe për atë që ka ndodhur”, ka njoftuar mediumi.