Sot votohet në Tërnoc, shpresa e fundit për Kamberin për t’u bërë deputet në Serbi

Për herën e katërt në njësinë numër 6 në Tërnoc të Luginës së Preshevës, sot (e enjte) do të organizohet procesi i rivotimit për zgjedhjet parlamentare të Serbisë, me shansin e fundit që Shaip Kamberi të zërë një ulëse si deputet në këtë Kuvend.

Tri herët e para procesi u përsërit, ndërsa një herë Kamberi siguroi ulësen, por në procesin e fundit të përsëritur e humbi.

Partia për Veprim Demokratik ditë më parë bëri thirrje për votim duke kërkuar pjesëmarrje më të madhe të shqiptarëve.

Siç kanë vlerësuar PVD-ja dhe partnerët, po ka tentativa në vazhdimësi për të penguar përfaqësimin e shqiptarëve në Parlament.

“Edhe me këtë rast u ritheksua se lufta kundër diskriminimit shtetëror të Serbisë, i cili po shtrihet në të gjitha sferat e jetës e që po ngushton hapësirat për një perspektivë më të mirë, duhet të vazhdojë me të gjitha mjetet politike, prandaj, edhe beteja për përfaqësim të dinjitetshëm parlamentar mbetet një ndër objektivat kryesore të veprimit tonë politik. PVD është e vetdijshme se ky proces zgjedhor që po zvarritet me ndërhyrje të shuma të shtetit, është shndërruar në lodhje për zgjedhësit e njësisë gjashtë, por, duke parë rëndësinë e momentit në të cilin ndodhemi, perspektivën në të cilën gjendet mbarë rajoni, i fton gjithë përkrahësit e dashamirët që, edhe kësaj radhe, t’i përgjigjen në mënyrë masive daljes në zgjedhje, për të dëshmuar fuqinë politike e përfaqësuese të shqiptarëve”, thuhej në komunikatën e PVD-së dhe Kamberit.

Për Kamberin përkrahje kanë ofruar edhe liderë partiakë e institucionesh në Kosovë, Shqipëri e Maqedoni të Veriut.

Në herën e tretë të rivotimit, Kamberi, nga Koalicioni i Shqiptarëve të Luginës nuk ka arritur për 13 vota të merr një ulëse në Kuvendin e Serbisë.

Kështu kishte bërë të ditur për Shqip.com, Ragim Mustafi, kryetari i Këshillit Kombëtar Shqiptar në Luginën e Preshevës

“Sipas rezultateve preliminare 598 për Koalicionin e Shqiptarëve të Luginës apo përShaip Kamberin, ndërsa gashtë për SPS, 10 të pavlefshme dhe një NADA. Për 13 vota nuk arrin Kamberi të bëhet deputet sipas rezultateve preliminare”, ka thënë ai.

Kamberit i duheshin 611 vota për të fituar mandatin e deputetit.

Në raundin e parë të zgjedhjeve, Kamberi kishte arritur të fitonte mandatin si deputetit në kuvend, ku kishte marrë 679 vota.

Lagja më e madhe në Bujanoc, Tërnoci, shkoi në rivotim pas ankesës së Partisë Socialiste Serbe në Komisionin Komunal Zgjedhor në Bujanoc./Shqip.com