Sigal Prishtina – Trepça, sonte vendoset finalisti në elitën e basketbollit kosovar

Dita e derbit mes Sigal Prishtinës dhe Trepçës është rezervuar për të dielën (sot). Kjo është përballja e pestë gjysmëfinale dhe njëkohësisht vendimtare.

Kush e fiton këtë sfidë do të kualifikohet në finale, aty ku po e pret Peja, që ka eliminuar Golden Eagle Yllin në gjysmëfinale.

Takimin e parë gjysmëfinal e fituan prishtinasit 82:70, por më pas fituan mitrovicasit 77:68.

Kryeqytetasit kaluan sërish në epërsi 2:1, kur fituan 87:71, ndërsa takimin e fundit e fituan ‘Xehetarët’ 82:77, duke bërë që finalisti të përcaktohet në sfidën e pestë.

Mitrovicasit në çerekfinale kishin mundur Bashkimin, ndërsa bardhekaltrit u kualifikuan direkt nga vendi i parë.

Në edicionin e rregullt të garave, Prishtina përfundoi e para me 22 fitore e gjashtë humbje, ndërsa Trepça e katërta me 17 fitore e 11 humbje.