Shqipëria barazon 0:0 me Ishujt Faroe, por ruan vendin e parë në grup – rotacioni i Sylvinho nuk jep rezultat

Kombëtarja e mbylli si e para si asnjëherë tjetër në grupin kualifikues të Euro 2024 dhe me një rekord pikësh, 15, po aq sa Çekia që u kualifikua si e dyta pas fitores 3 – 0 me Moldavinë.

Shqipëria barazoi pa gola me Ishujt Faroe të hënën në stadiumin “Air Albania” i mbushur i tëri e shoqëruar me një koreografi fantastike në tribuna nga tifozeria kuq e zi.

Trajneri Sylvinho aktivizoi futbollistë të cilët kishin pak minuta në sfidat zyrtare duke ndryshuar gjysmën e formacionit titullar në dallim nga ndeshjet e fundit.

Kuqezinjtë hasën vështirësi përballë skuadrës së fundit në grup që ushtroi presion, madje duke rrezikuar edhe disa herë portën e Strakoshës.

Rasti i parë i vërtetë i Shqipërisë ishte në minutën e 36’ me Bajramin, por portieri reagoi siç duhet.

Uzuni dhe Daku rrezikuan në minutat shtesë por pa rezultat.

Futbollistët e Kombëtares u gjendën disa herë në pozicion jashtë loje. Në pjesën e dytë rastet e Uzunit dhe Asanit nuk sollën gol.

Megjithatë, Shqipëria e sheh veten në finalet e kampionatit Europian, në Gjermani verën e ardhshme.

Emocione më të forta do të përjetohen në finalet e Euro 2024 nga 14 Qershori deri më 14 Korrik, ku do të jetë Kombëtarja Shqiptare dhe ekipet më të mira të kontinentit në 31 sfida të përzgjedhura.