SHBA-së, BE-së dhe Britanisë ju kërkohet të merren në mënyrë kritike me Vuçiqin

Politikanët e huaj nga vende të ndryshme perëndimore i kanë bërë thirrje Bashkimit Evropian, Shteteve të Bashkuara të Amerikës dhe Britanisë së Madhe që të merren më në mënyrë kritike me presidentin serb Aleksandër Vuçiq.

Në përshkallëzimin e konfliktit ndërmjet Serbisë dhe Kosovës, ata shohin shumë indulgjencë në pozicionin e Beogradit.

“Përpjekjet e Serbisë për të prishur zgjedhjet demokratike në Kosovë duhet të denoncohen publikisht si ndërhyrje e huaj dhe duhet të ndërmerren veprime konkrete për ta mbajtur Serbinë përgjegjëse nëse ajo vazhdon të minojë zgjedhjet e lira dhe të ndershme”, thuhet në letrën e ekspertëve të politikës së jashtme drejtuar përfaqësuesit të Lartë të BE-së për Punët e Jashtme Josep Borrell dhe Ministrave Anthony Blinken (SHBA) dhe James Cleverly (MB).

Letra është nënshkruar, ndër të tjera, nga kryetarët e komiteteve të politikës së jashtme të Bundestagut, Michael Roth (SPD) dhe të Senatit të SHBA, Bob Menendez. Autorët përfshijnë gjithashtu kryetarët e komitetit të punëve të jashtme të Dhomës së Komunave Britanike dhe parlamenteve të Republikës Çeke, Ukrainës, Irlandës, Estonisë, Letonisë dhe Lituanisë.

“Qasja aktuale nuk po funksionon,” shkruajnë Roth, Menendez dhe homologët e tyre. “Ne kërkojmë që komuniteti ndërkombëtar të mësojë nga e kaluara jonë dhe të sigurojë që ne të mos ndjekim politika me qendër Beogradin në Ballkan.”

Ata gjithashtu bëjnë thirrje “të shqyrtohet një politikë e diplomacisë parandaluese për të parandaluar një përkeqësim të mëtejshëm të situatës së sigurisë në veri të Kosovës”. Ata që mbrojnë shtetin ligjor dhe demokracinë nuk duhet të qortohen.

Ndër tjera, theksohet se duhet të kthehet ekuilibri dhe proporcionaliteti në marrëdhëniet me Kosovën dhe Serbinë.

“Kosova është shtet sovran dhe demokraci funksionale. Ky fakt duhet të përbëjë bazën për politikën tonë të përbashkët ndaj krizës aktuale. Përpjekjet për të prishur zgjedhjet demokratike në Kosovë nga Serbia duhet të kritikohen publikisht si ndërhyrje e jashtme me masa të qarta që ata të mbahen përgjegjës nëse vazhdojnë t’i minojnë zgjedhjet e lira dhe të drejta. Kjo do të ndihmojë në lehtësimin e zgjedhjeve të ardhshme me pjesëmarrje të plotë nga të gjitha komunitetet e pranishme në komunat veriore. Ne duhet të ushtrojmë diplomaci parandaluese nëse kriza aktuale duhet të zgjidhet, dialogu i lehtësuar nga BE-ja duhet të japë rezultate pozitive dhe zbatimi i Marrëveshjes së Ohrit duhet të respektohet”.