SHBA pret që Suedia të bëhet anëtare e NATO-s përpara samitit të korrikut

Shtetet e Bashkuara presin me padurim Suedinë si anëtare të NATO-s përpara samitit të ardhshëm të aleancës në korrik dhe do të inkurajojnë Turqinë dhe Hungarinë që të ratifikojnë pranimin.

Kështu u shpreh të mërkurën gjatë një vizite në Suedi, sekretari amerikan i mbrojtjes, Lloyd Austin, shkruan Reuters.

Së bashku me Finlandën, Suedia aplikoi për t’u anëtarësuar në NATO në maj të vitit të kaluar. Aplikimi i Finlandës u përpunua në kohë rekord dhe ajo u bë anëtari i tridhjetë e një i aleancës në fillim të këtij muaji.

“Ne presim që së shpejti të mirëpresim Suedinë si anëtaren e 32-të NATO-s. Për të qenë të qartë, ne presim që kjo të ndodhë përpara samitit në korrik”, tha Austin në një konferencë për shtyp.

“Ne inkurajojmë aleatët tanë, Turqinë dhe Hungarinë, që të ratifikojnë pranimin e Suedisë sa më shpejt të jetë e mundur“.

Aderimi i Suedisë është penguar nga Turqia dhe Hungaria, të cilat ende nuk e kanë ratifikuar Suedinë si anëtare.

Austin ishte në Suedi për të zhvilluar bisedime me Ministrin e Mbrojtjes Pal Jonson në lidhje me luftën në Ukrainë dhe aplikimin e Suedisë në NATO.

Vizita e sekretarit amerikan të mbrojtjes përkon edhe me stërvitjen më të madhe ushtarake të Suedisë për më shumë se një çerek shekulli, Aurora 23.

Rreth 700 marina amerikanë do të marrin pjesë në stërvitje, si dhe trupa nga Britania, Finlanda, Polonia, Norvegjia, Estonia, Letonia, Lituania, Ukraina, Danimarka, Austria, Gjermania dhe Franca.

Në total, rreth 26,000 personel ushtarak do të marrin pjesë si në stërvitjet rreth Suedisë në tokë, në det dhe në ajër. /Reuters