SHBA-ja donacion për burgjet e Kosovës, dhurohen tabela elektronike, kamera sigurie

Shërbimi Korrektues i Kosovës ka pranuar donacion nga Ambasada e SHBA-së, në të cilin përfshihen tabela elektronike, kamera sigurie, databaza dhe monitor të ndryshëm.

Përmes një njoftimi nga faqja zyrtare e SHKK-së, thuhet se nëpërmjet këtyre mjeteve do të monitorohen të gjitha qendrat korrektuese dhe ato të paraburgimit.

“Në donacion përfshihen tabela elektronike, kamera sigurie, databaza dhe monitorë të ndryshëm, përmes së cilëve zyrtarët korrektues nga Qendra Operative e Shërbimit Korrektues të Kosovës do të monitorojnë të gjitha qendrat korrektuese dhe ato të paraburgimit”, thuhet në njoftimin e SHKK-së.

Sipas SHKK-së, ky donacion do të ndikojë në rritje të nivelit të sigurisë.

“Donacioni do të ndikojë në rritjen e nivelit të sigurisë brenda dhe jashtë institucioneve korrektuese, ka për qëllim luftimin dhe parandalimin e dukurive negative, e po ashtu edhe përmirësimin e kushteve të punës së përditshme të zyrtarëve korrektues”

Ambasada e Shteteve të Bashkuara të Amerikës me donacionet e saj përmes INL & ICITAP ka mbështetur dhe po vazhdon ta mbështes zhvillimin e SHKK-së në ndërtimin e një sistemi të avancuar, të pavarur, të sigurt dhe të vetëqëndrueshëm.

Pranim-dorëzimi i donacionit u nënshkrua nga Zëvendësuesi i Drejtorit të Përgjithshëm të Shërbimit Korrektues të Kosovës, Sami Gashi dhe Drejtori i Byrosë për Çështje Ndërkombëtare të Narkotikëve dhe Zbatimit të Ligjit (INL) në Kosovë, Shawn Waddoups./Shqip.com