Sërish alarm për bombë te rektorati i UP-së
Policia e Kosovës është duke qëndruar tek ndërtesa e Rektoratit të Universitetit të Prishtinës “Hasan Prishtina”, pas një alarmi për bombë.
Zëdhënësja e Policisë së Kosovës për rajonin e Prishtinës, Flora Ahmeti, ka bërë të ditur për Shqip.com se kanosja e dyshimtë ka ardhur përmes postës elektronike.
“Rreth orës 12:00 është pranuar informata për dyshimet që ndërlidhen me një shpërthim të mundshëm në Rektoratin e Universitetit “Hasan Prishtina” në Prishtinë. Informacionet e para flasin se kanosja e dyshimtë ka ardhur përmes postës elektronike. Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën”, ka bërë të ditur Ahmeti.
Edhe gjatë javës së kaluar, PK kishte pranuar informacion për një alarm për bombë po në të njëjtin vend.
Mirëpo pas inspektimit, Policia e Kosovës ka njoftuar se alarmi ishte i rremë./Shqip.com