Serbia i dërgon notë proteste ambasadorit turk për dronët e blerë nga Kosova

Sekretari shtetëror në Ministrinë e Mbrojtjes, në Serbi, Nemanja Staroviq, pretendon se Turqia është duke punuar intensivisht në armatosjen, trajnimin dhe pajisjen e Forcave të Sigurisë së Kosovës.

Sipas tij, agjencitë e inteligjencës serbe kanë të dhëna se Turqia i ka dhuruar Prishtinës dronë, sisteme kundër armatures dhe lloje të tjera të armëve, dhe thotë se Serbia i ka dorëzuar një notë proteste ambasadorit të Turqisë, raporton Kosovo-online.

“Sigurisht që ne i kemi ndjekur intensivisht të gjitha këto procese, agjencitë tona që janë përgjegjëse për këtë, prej muajsh i kanë raportuar udhëheqjes shtetërore në detaje për gjithçka që po ndodh dhe natyrisht në përputhje me këtë, duke përdorur kanalet diplomatike. Ne i kemi paralajmëruar përfaqësuesit e Turqisë se kjo që po ndodh është absolutisht e papranueshme. Natyrisht, ata flasin për faktin se bëhet fjalë për një lloj aranzhimi komercial, për shitje”, tha Staroviq.

Ai ka theksuar megjithatë se bëhet fjalë për armatim që nuk lejohet në Kosovë dhe që FSK nuk mund t’i posedojë.

“Nga ana tjetër, në bazë të gjithë asaj që dimë, duke marrë parasysh buxhetin e ndarë për Forca të Sigurisë së Kosovës, nuk kanë para për një gjë të tillë dhe nuk mund të bëhet fjalë për aranzhime komerciale, dhe është mjaft. i sigurt se janë donacione turke”, tha Staroviq.

Ai shtoi se dronët janë prezantuar publikisht nga kryeministri i Kosovës, Albin Kurti dhe se tashmë të gjithë janë të vetëdijshëm për këtë fakt.

“Fatkeqësisht, nuk bëhet fjalë vetëm për dronët e tipit Bajraktar, bëhet fjalë edhe për sisteme shumë serioze, të sofistikuara kundër armaturës OMTAS, bëhet fjalë për mortaja, granatahedhës e të gjitha. Prandaj, ngre nivelin e rreziqeve dhe kërcënimeve, në radhë të parë për popullatën serbe që jeton në Kosovë, por edhe për Republikën e Serbisë në tërësi”, thotë Staroviq.

“Dikush duhet t’i përgjigjet pyetjes se si është e mundur që 24 vjet pas përfundimit të luftës, pas miratimit të Rezolutës 1244, harmonizimit dhe miratimit të marrëveshjes ushtarako-teknike nga Kumanova, ka ardhur deri aty që – në vend të kësaj. të demilitarizimit – ne kemi të ashtuquajturat Forca të Sigurisë së Kosovës në Kosovë, të pajisura me një teknikë shumë sulmuese”, thotë Staroviq.

Në këtë kuptim, thekson ai, është i rëndësishëm takimi i presidentit Aleksandar Vuçiq dhe Sekretarit të Përgjithshëm të NATO-s, Jens Stoltenberg, i cili duhet të mbahet këtë javë.