Serbët protestojnë në Veri – “po s’na u lejua as 3 prilli, do marrim masa serioze”

Dhjetëra qytetarë serbë kanë nisur protestën në veri të Mitrovicës në sheshin “Car Lazar”, raporton Shqip.com.

Ata kanë protestuar për moslejimin e mbajtjes së referendumit për ndryshime Kushtetuese në Serbi, edhe në Kosovë.

Protestës i është bashkangjitur edhe përfaqësuesi i Listës Serbe, Goran Rakiq.

Rakiq paralajmëroi reciprocitet në rast se më 3 prill nuk do të lejohen zgjedhjet e Serbisë në Kosovë.

Ai nuk tregoi se çfarë masash mund të marrin si komuna veriore por tha se do të jenë serioze.

Ndërkaq, protestuesit mbanin pankarta me mbishkrime “Serbët nga Kosova janë të fuqishëm me shtetin e tyre, Serbinë”; Pse jemi ne qytetarë të rendit të dytë”; “Votoj për paqe jo për terror”.

Si shenjë proteste është vendosur një kuti e votimit në qendër të sheshit.

Iniciator i protestës është Iniciativa Qytetare “Mbijetesa e Serbisë” nga Mitrovica.

Theksojmë se në seancën e jashtëzakonshme në Kuvendin e Kosovës, deputetët miratuan me 76 vota pro rezolutën e mosmbajtjes së referendumit serb në Kosovë./Shqip.com