Sali Berisha i reagon Vuçiqit: Po luan me zjarrin

Pas situatës së tensionuar në veri të Kosovës dhe sulmit ndaj Policisë së Kosovës ka reagur kryetari i Partisë Demokratike, Sali Berisha.

Përmes rrjetit Facebook, Berisha ka thënë se Vuçiç po luan me zjarrin dhe po bën thirrje luftënxitëse.

Postimi i Berishës:

Serbomadhi Aleksander Vuçiç po luan me zjarrin!

Deklarimi i tij për futjen e 1 mijë ushtarëve serb ne Kosovë është thirrje luftënxitëse.

Të dashur miq, Presidenti i Serbomadhisë, Putini i vogël, po i bie këto kohë brirëve të konfliktit të ri në rajon. Paramilitar, forca speciale e tij dhe banda kriminale me mercenarët e Wagner po bëjnë gjithçka të destabilizojnë veriun e Republikës së Kosovës.

Çdo natë vendosin eksplozive, shkrepin breshëri kundër forcave të  Policisë së Kosovës që sigurojnë rendin, jetën dhe veprimtarinë normale të banorvë të zonave të Veriut të Kosovës. Këta kriminelë kanë plagosur me armë zjarri anëtarë në detyrë të forvave policore të Kosovës, bllokojnë rrugë dhe djegin makina.

De facto ai deklarohet për fillimin e një konflikti të ri në Kosovë. Në këto deklerata luftënxitëse ai mbeshtet jo vetem nga padroni i tij në Kremlin, por edhe nga vasali i tij në Tiranë, Edi Rama i cili është një armik i vërtetë i kombit shqiptar dhe mbrojtes i shpifur i qëndrimit të padronit të tij ndaj Rusisë.

Duke mbeshtetur në emër te Partisë Demokratike, fuqimisht, autoritet e Kosovës, sovranitetin dhe integritetin e saj territorial, dënoj me ashpërsinë më të madhe përpjekjet e presidentit të serbomadhisë Vuçiç për të ndezur flakët e nje konflikti të ri në rajon.

Gjithashtu i bëj thirrje komunitetit ndërkombëtar të vendos atë sa me shpejt para Gjykatës dhe ligjit ndërkombëtar për genocid dhe krime lufte si kusht themelor që të vendoset paqe e qëndrueshme në rajonin tonë.

Policia e Kosovës ka njoftuar mbrëmjen e sotme se ka pasur të shtëna me armë zjarri në rrugën që shpie në drejtim të pikës kufitare të Bërnjakut.

Policia e Kosovës gjithashtu njoftoi se në vetëmbrojtje, njësitë policore janë detyruar t’iu kundërpërgjigjen me armë zjarri grupeve kriminale të cilët janë larguar në drejtim të panjohur.