Rusia po bën plane për vendosjen e armëve bërthamore në Bjellorusi

Rusia ka avancuar planin e saj për vendosjen e armëve bërthamore taktike në Bjellorusi, duke nënshkruar një marrëveshje të enjten për të lehtësuar ngritjen e një “baze” të posaçme në vendin fqinj.

Plani për të vendosur armë bërthamore përtej kufijve të Rusisë u njoftua nga presidenti Vladimir Putin në një intervistë televizive më 25 mars.

Kremlini nuk ka specifikuar datën e saktë të vendosjes, megjithatë pret që objekti i ri të jetë gati brenda pak më shumë se një muaji në Bjellorusi.

Moska nuk i ka mbajtur armët e saj bërthamore jashtë kufijve rusë që nga rënia e Bashkimit Sovjetik në 1991.

Por raketat Iskander-M, me aftësi për të mbajtur koka luftarake, tashmë u janë dorëzuar forcave të armatosura bjelloruse, tha ministri rus i mbrojtjes Sergei Shoigu.

“Ushtarët bjellorusë kanë marrë trajnimin e nevojshëm”, shtoi Shoigu, duke theksuar se të dy vendet do të ofrojnë sigurinë optimale.

Disa aeroplanë Su-25 gjithashtu do të konvertohen për t’u përdorur në vendosjen bërthamore, tha ai.

SHBA vlerëson se Rusia ka rreth 2000 “koka bërthamore” që mund të përdoren për të fituar avantazhe specifike në fushën e betejës.