RTK ofron katër vende pune për gazetarët nga Ukraina

Radio Televizioni i Kosovës ka ofruar katër vende pune për gazetarët nga Ukraina.

Ky vendim është marrë në mbledhjen e mbajtur të shtunën me 16 prill 2022 nga Bordi i RTK-së.

“Pas vendimit të Qeverisë së Republikës së Kosovës për strehimin e 20 gazetarëve nga Ukraina, në koordinim me Qendrën Evropiane për Lirinë e Shtypit dhe Medias (ECPMF) dhe Federatën Evropiane të Gazetarëve (EFJ), Bordi dhe Menaxhmenti i Radio Televizionit të Kosovës në mbledhjen e mbajtur të shtunën me datë 16 prill 2022, kanë vendosur të ofrojnë hapësirat e transmetuesit publik (zyra, tavolina, qasje në internet dhe të gjitha pajisjet përkatëse të punës) për katër gazetarë nga Ukraina”, thuhet në njoftimin e RTK-së.

RTK ka planifikuar t’u ofrojë akomodim në hapësira të punës deri në gjashtë muaj katër gazetarëve ukrainas, të cilët u detyruan të largohen nga vendi i tyre pas agresionit të Rusisë ndaj Ukrainës.

“Në përputhje me dokumentin zyrtar të këtij vendimi, prioritet do të kenë gazetaret gra të cilat do të zgjidhen nga Federata Evropiane e Gazetarëve (EFJ) dhe Qendra Evropiane për Lirinë e Shtypit dhe Medias (ECPMF)”, thuhet ndër të tjera në njoftimin e RTK-së.

RTK gjithashtu ka bërë të ditur se do të ndajë të gjitha pajisjet e nevojshme në hapësirat e veta të punës si në ndërtesën e televizionit ashtu edhe në atë të radios, si dhe do të mbajnë  bashkëpunim të ngushtë në këtë drejtim me Asociacionin e Gazetarëve të Kosovës (AGK)./Shqip.com