Lajme

Rexhaj i VV-së flet për postimin e Abazit: Në vend të statusit, çështjen do ta adresoja tek lidershipi i partisë

Deputeti i Lëvizjes Vetëvendosje, Arbër Rexhaj

“Lëvizja Vetëvendosje është demokratike, deputetët tanë mund të japin mendimet e veta. Për shembull, nëse do të isha unë në vend të Hakiut, unë në vend të statusit, unë këtë veprim dhe këtë transmetim do ta bëja tek lidershipi, pa shkruar status.”

Kështu është shprehur deputeti i Lëvizjes Vetëvendosje, Arbër Rexhaj, deria ka komentuar reagimin e deputetit Haki Abazi, i cili nuk mori pjesë në seancën e së martës të Kuvendit të Kosovës, duke thënë se arsyet ja ka përcjellë lidershipit të partisë.

Haki Abazi i VV-së

I pyetur nëse ka ndonjë pakënaqësi brenda VV-së, Rexhaj ka thënë se kjo nuk është e mundur, pasi që ka kaluar ajo kohë.

“Në asnjë mënyrë, ka kaluar koha kur Lëvizja Vetëvendosje ka ndonjë krizë nga brenda dhe mendoj se jemi grupi më i fuqishëm parlamentar me një lloj koherence e konsistence dhe natyrisht se kemi të drejtë ta shprehim mendimin”.

“Unë tregova se si do të veproja unë, pasi që ne jemi deputetë dhe jemi kolegë, unë e kam mik Abazin, por ai e ka zgjedhur një rrugë më të shpejtë duke e bërë publike veprimin e tij”, ka thënë Rexhaj në Kanal 10.

Në anën tjetër, deputeti Rexhaj ka mohuar edhe mundësinë se reagimi i Abazit vjen si rezultat i replikës me Kryetarin e Kuvendit nga radhët e Lëvizjes Vetëvendosje, Glauk Konjufca, i cili të hënë gjatë seancës planare nuk ia kishte ofruar mundësinë për të replikuar deputetit Abazi.

“Nuk e besoj, Hakiu e din më mirë është mirë ta pyesni atë, për besë nuk e di. Mua nuk më brengos ky status i Hakiut, për arsye se Hakiu i paska dërguar tek lidershipi, unë tregova çfarë do të bëja unë, ndërsa ai ka zgjedhur ta bëjë kështu”, ka shtuar Rexhaj.

Ai ka thënë se deputeti Abazi është i hapur për mediat dhe mund të flas vetë për veprimin e tij./SHQIP.com