Reagon kardiokirurgu Shala, të cilin drejtori e akuzoi për papërvojë

Kardiokirurgu Kushtrim Shala ka dalë me një reagim pak orë pasi u akuzua nga drejtori i Klinikës për mungesë përvoje, në rastin e një operimi të rrallë të kryer mesnatën e së martës në QKUK. Shala e kishte cilësuar të suksesshëm intervenimin, por pacienti pas rreth tri orësh vdiq. Drejtori i Klinikës i ka quajtur kardiokirurgët jokompetentë dhe të papërvojë për një intervenim të tillë

Teksa pacienti 63-vjeçar ende ishte në gjendje kome, kardiokirurgët e kanë paraqitur si sukses përmes një postimi me disa foto në Facebook. E pas vdekjes së pacientit, drejtori i Klinikës së Kardiokirurgjisë, Rifat Brahimaj, i ka quajtur jokompetentë e të papërvojë mjekët që kryen intervenimin në zemrën e pacientit. Ai ka kërkuar hetim. Në SHSKUK kanë thënë se mjekët e kanë të ndaluar publikimin e pamjeve nga intervenimet.

Në reagimin e tij në Facebook, Shala ka thënë se ndaj tij është bërë tentim për eliminim profesional nga Brahimaj të cilin e ka akuzuar vetë për mungesë përvoje.

Shala ka thënë se diseksioni akut aortik paraqet emergjencë kardiokirurgjike dhe është jashtëzakonisht vdekjeprurës nëse nuk trajtohet me kohë. “Vdekshmëria për diseksion akut të aortës të patrajtuar arrin 50 për qind në 24 orët e para. Nëse diseksioni shoqëroet me rupturë të aortës (siç ka qenë rasti me pacientin në fjalë) vdekshmëria shkon deri në 90 për qind në orët e para”, ka thënë Shala, që ka shtuar se pacienti në fjalë “ishte në margjinat e jetës”.

Ai ka shtuar se familjarëve u janë sqaruar të gjitha detajet dhe kanë pranuar kryerjen e intervenimit. Ka vlerësuar se intervenimi është kryer me sukses.

Reagimi i plotë kardiokirurgut, Kushtrim Shala:

DISEKSIONI I AORTES ME RUPTURE, GJYKIMI PUBLIK DHE TENTIMI PER ELIMINIMIN PROFESIONAL TIMIN NGA “U.D. DREJTORI” I PUSHIMEVE DHE PREJ PUSHIMEVE

Pasi nuk mu dha mundësia që të bëj diskutim në kolegjiume profesionale që rëndom bëhen në çdo qendër të mirëfillt kardiokirurgjike,po ju drejtohem edhe unë mediave në cilësinë e Kardiokirurgut operator dhe njëherit kujdestar në kardiokirurgji me daten 03.01.2023. Për dallim nga ushtruesi I detyrës së drejtorit të Kardiokirurgjisë Rifat Brahimaj i cili pa qenë fare prezent dhe pa patur fare idenë për gjendjen e pacientit në pranim, rrjedhën e trajtimit (operacionit) dhe gjendjen në dalje të operacionit, pa kontaktuar fare me mua si kardiokirurg operator dhe pa kërkuar sqarim për rrjedhjen e operacionit (që ka të drejtë t’a bëj në cilësinë e u.d. drejtorit) thërret mediat dhe u flet per operacionin tim e madje dhe këtë e bënë duke qenë në pushim vjetor.

Diseksioni akut aortik paraqet emergjencë kariokirurgjike dhe është jashtzakonisht vdekjeprurës nese nuk diagnostikohet dhe trajtohet me kohë. Përafersisht 20% e pacienteve me diseksion te aortes vdesin para se të arrijnë në spital. Vdekshmëria për diseksion akut të aortës të patrajtuar arrin 50% në 24 orët e para. Nëse diseksioni shoqërohet me rupture të aortës (siq ka qene rasti me pacientin ne fjalë) vdekshmëria shkon deri ne 90% ne orët e para.

Pas thirrjes për konsultë urgjente nga Kardiologjia, e kam parë pacientin dhe kam vendosur indikaconin për operim emergjent. Pacienti ishte në margjinat e jetës. Ishte në iskemi të të gjitha organeve të trupit, me paralizë të extremiteteve të majta, shok kardiogjen, hypotension (për shkak të tamponadës).

Diseksioni i aortes (çarja) kishte përfshirë aortën në tërë gjatësinë e saj (deri në bifurkacion) edhe enët supraaortike (te dy Arteriet karotide dhe dy arteriet subclavia), si dhe arteriet viscerale . Famijareve u janë sqaruar të gjitha detajet lidhur me gjendjen e tij dhe arsyeshmërinë e intervenimit kirurgjik. Të cilët kanë juridikisht kanë pranuar, që të kryhet intervenimi. Pas përgatitjes për operim kam kërkuar asistencë nga mjeku në gadishmeri dr. Endrit Shala, i cili i është përgjigjur thirjes menjëherë. Pacienti në shok kardiogjen i është nënshtruar indukimit të anestezionit.

Kemi filluar operimin. Pas kanulimit aksillar te djathtë (right upper brachial) është bërë hapja e krahërorit ku kemi gjetur tamponadë dhe rupturë të Aortes ascendente (aortic root). Meqë paraprakisht pacienti ishte kanuluar për qarkullim jashtëtrupor (CPB), në këto momente nuk kishte fare rrezik jetë për pacientin përkundër ruptures prezente. Muri I aortës ishte komplet i çarë dhe çarja (tear) kishte ndodhur mu në rrënjë të aortës, mes ostiumit koronar të majtë dhe atij të djathtë. Por që valvula aortale ishte e shëndoshë pa lezione, por me regurgitim masiv, ashtu siç ndodh në pacientët e tillë pothujse çdo herë.

Në një konfiguracion të tillë patologjik, duke qenë rrënja e Aortës komplet e shkatërruar, vendosa ta ruaj valvulën aortale sepse ajo ishte e shëndoshë dhe kështu veprohet kudo në botë. Çfarëdo procedurë tjetër që e largon valvulën e shendosh nga pacienti është MALPRAKTIKË (MALPRACTICE). Andaj intervenimi është kryer me sukses dhe pacienti është shkëputur nga qarkullimi jashtëtrupor me lehtësi dhe ka dalur në kujdes intensiv stabil hemodinamikisht, madje me shtypje arteriale edhe 130/80 Ajo që ndodh rëndom tek diseksionet e aortës është çrregullimi i rëndë i faktorëve të koagulimit për shkak të ekstravazimit të gjakut.

Edhe në rastin e tillë kishte dëmtim koagulimi meqë gjatë 10 orëve në vijim, pacienti kishte pasur drenazhë më shumë sesa e tolerohet. Sot në botë në plot raste të tilla ipen faktorë koagulimi në periudhën postoperatore por ja që askush në kujdesin intensiv nuk e kishte ndërmarr një hap të tillë, e në rastin më të keq substanca të tilla nuk ka në QKUK. Pacienti ka qenë i monitoruar nga anesteziologu dhe për çfarëdo eventualiteti kirurgjik emergjent, përgjegjës ka qenë kardiokirurgu kujdestar, i cili me gjasë nuk e ka parë të arsyeshme revizionin e pacientit.

Sepse kirurgu operon pacientin dhe atë e le nën përkujdesjen e ekipës kujdestare, sepse pas një kujdestarie 24 orëshe në këmbë (si mjek I vetëm në klinikë) dhe me një operacion emergjent me kohëzgjatje disa orëshe gjatë gjithë natës nuk mund të pritet që vazhdoj akoma ne klinikë ta përcjell pacientin. Rastet e tilla të vdekjeve brenda spitalore kërkoj që të bëhet autopsia për të parë arsyen e vdekjes.

Poashtu inicimi i çfarëdo hetimi në Kardiokirurgji është mëse i nevojshëm sepse Kardiokirurgjia është në margjinat e ekzistencës. Komentimi i ushtruesit të detyrës së drejtorit aktual të Klinikës lidhur me rastin dhe atë komentim në media pa i diskutuar fare në konziliumet prefesionale, është jo etik, jo profesional, kriminal, sepse ka të bëjë me tendencën për eliminim të kolegut. Unë madje tashmë disa vite kam informuar Drejtorinë Gjenerale për problemet ekzistenciale në Kardiokirurgji.

Opinioni po ashtu e di që rrënimi i saj tashmë ka ndodhur prej Rifat Brahimaj. Kushtet në të cilat punohet sot në Kardiokirurgji janë minimaliste. Cilësia është larg të pranueshmes dhe kriminaliteti i brendshëm duhet hetuar vërtetë. Duke njohur bekgraundin profesional dhe etik të Rifat Brahimaj nuk quditem për veprimin mjeran të cilin ka zgjedhur ta bëjë, ngase në PSEUDOKARDIOKIRURG me vetëm 16 MUAJ TRAJNIM ME KORRESPODENCË e me vdekshmëri që krahasohet me ato të laboratoreve eksperimentale (ftoj organet e hetuesisë ti shohin dosjet e statistikat ) nuk ka aftësi e dijeni profesionale të gjykoj punën e dikujt tjetër. Mjerisht njerëz të tillë vendosen në pozita menaxheriale…

Menaxhmenti në Kardiokirurgji ose duhet të shkarkohet dhe të hetohet rrënjësisht që tani ose të gjithë ne të tjerët do të shkaterrohemi. Tjetersimi i këtij postimi do ketë pasoja ligjore! Mund te botohet vetëm si i plotë!

P.s. Në foto Tyrone David (babai i operacionit David-prej te cilit mbanë emrin) dhe unë (Kushtrim Shala) datë 25.03.2017

Kirurgu e quan sukses operacionin. Drejtori thotë se mjeku s’kishte përvojë. Pacienti vdiq

Një operacion i rrallë në zemër është kryer mesnatën e së martës për herë të parë në QKUK. Kardiokirurgët përmes publikimit të fotografive në rrjete sociale e kanë vlerësuar si sukses intervenimin kompleks, por pacienti pas rreth tri orësh vdiq. Drejtori i Klinikës i ka quajtur kardiokirurgët jokompetentë dhe të papërvojë për një intervenim të tillë

Një pacient 63-vjeçar ka vdekur tri orë pasi iu nënshtrua një operacioni që më herët nuk ishte kryer asnjëherë në Qendrën Klinike Universitare.

Teksa pacienti ende ishte në gjendje kome, kardiokirurgët e kanë paraqitur si sukses përmes një postimi me disa foto në Facebook.

E pas vdekjes së pacientit, drejtori i Klinikës së Kardiokirurgjisë, Rifat Brahimaj, i ka quajtur jokompetentë e të papërvojë mjekët që kryen intervenimin në zemrën e pacientit. Ai ka kërkuar hetim.

“Duhet të bëhet vlerësim i rastit. Duhet të hetohet pse është kryer një operacion i tillë nga një kirurg i cili nuk ka pasur përvojë. Duhet të shikohet rasti dhe të ndërmerren masa konform rregulloreve. Ka qenë kujdestar dhe personi vetë vendos për çfarë lloj operacioni, por sigurisht duhet të raportojë më pas dhe të hetohet nëse ka pasur shkelje”, ka thënë Brahimaj.

Referuar statusit të kardiokirurgut Kushtrim Shala, në të cilin e quan operacionin kompleks, pjesëmarrës në të ishte edhe kolegu i tij, Endrit Shala.

“Për herë të parë në QKUK në Kardiokirurgji kemi realizuar operacionin David te një pacient me diseksion akut të aortës dhe rupturë në nivel të rrënjës së saj. Operacionet e tilla komplekse kryhen kryesisht në qendra te mëdha me volum dhe eksperiencë afatgjate dhe të specializuara për kirurgjinë e aortës. Njëkohësisht gjatë këtij operimi për herë të parë në raste të tilla është realizuar proteksion i zemrës me kardioplegji Del Nido, njëra ndër kardioplegjitë që ofron proteksion superior të miokardit (ruajtjes së zemrës gjatë operacioneve të tilla)”, ka shkruar Shala në Facebook.

Sipas burimeve, operacioni zgjati rreth 10 orë e Shala përveç fotografive me stafin mjekësor, ka publikuar edhe procedurën kirurgjike derisa po ndërhynin te pacienti, gjë që është e ndaluar me rregullore të ShSKUK-së.

Për mosrespektimin e kësaj urdhërese, SHSKUK ka kërkuar nga drejtori i Klinikës të ndërmarr masa ndaj mjekut.

“Të gjithë drejtorët e klinikave, spitaleve të përgjithshme dhe njësive tjera në kuadër të ShSKUK-së, disa herë janë të njoftuar përmes Urdhëresës, në formë të Qarkores Informative, nga menaxhmentet në të kaluarën, por edhe tani, se kanë ndaluar publikimin e shkrimeve, fotografive dhe materialeve tjera nga institucionet ku punojnë, pa autorizim paraprak nga Zyra për Medie dhe Marrëdhënie me Publikun në ShSKUK, kjo me qëllim që informatat që publikohen të jenë konform kritereve të përcaktuara etike dhe profesionale. Secili drejtor i institucionit, në këtë rast edhe drejtori i Shërbimit të Kardiokirurgjisë, ka obligim që të ndërmarrë masat konform legjislacionit në fuqi, për mosrespektim të kësaj urdhërese”, thuhet në njoftimin e Zyrës për Media të SHSKUK-së.