Qeveria ndan 100 euro shtesë për pensionistët- ekzekutohen gjatë këtij muaji
Qeveria e Kosovës ka ndarë 100 euro shtesë për pensionistët- në kuadër të pakos për përballje të inflacionit të prezantuar javë më parë.
Kjo i ka kushtuar Qeverisë mbi 28 milionë e 208 mijë e 800 euro dhe do të ndahen në tetor.
“Në kuadër të Pakos për përballje me Inflacionin që kemi disejnuar muajin e kaluar, kemi paraparë mbështetje edhe për pensionistët. Për pensionistët ka marrë formën e një shume njëhershme prej 100 eurosh e cila do të ekzekutohet në llogaritë e tyre gjatë këtij muaji”, ka thënë zv/kryeministër, Bisnik Bislimi.
Pos shtesave për pensionistët, Pakoja për përballje me inflacionin parasheh edhe nga 50 euro shtesa në muaj për punëtorët e sektorit publik deri në fund të vitit dhe shumë të përnjëhershme prej 100 eurosh për studentët.
/Shqip.com