Prokurorët ukrainas kërkojnë dënim të përjetshëm për ushtarin rus në gjyqin për krime lufte

Prokurorët ukrainas të enjten kërkuan që një ushtar rus të dënohet me burgim të përjetshëm pasi pranoi fajësinë për vrasjen e një civili ukrainas.

Vadim Shishimarin është duke u përballur me gjyqin e parë për krime lufte që nga fillimi i luftës në Ukrainë.

Ai akuzohet se qëlloi një 62-vjeçar në kokë përmes një dritareje të hapur të një makine në një fshat në rajonin verilindor Sumy, më 28 shkurt, katër ditë pas pushtimit, shkruan Euronews.

Shishimarin, i cili ka pranuar akuzat, dëshmoi të enjten se ai qëlloi një civil me urdhër të dy oficerëve dhe u lut që e veja e viktimës ta falte atë.

“E kuptoj që nuk mund të më falësh, por po të lutem për falje”, tha Shishimarin.

Ushtari 21-vjeçar i tha një gjykate në Kiev se oficeri këmbënguli se ukrainasi, i cili po fliste në celularin e tij, mund të tregonte vendndodhjen e tyre tek forcat ukrainase.

Të enjten ai i kërkoi të vesë së viktimës, e cila gjithashtu u paraqit në gjyq, që ta falte për atë që bëri.

Kateryna Shelipova, tha se bashkëshorti i saj 62-vjeçar, Oleksandr Shelipov, doli për të parë se çfarë po ndodhte kur të shtënat me armë ranë jashtë shtëpisë së tyre.

Kur të shtënat pushuan pak më vonë, ajo doli dhe gjeti burrin e saj të vrarë me armë zjarri jashtë shtëpisë së tyre.

Shelipova i tha gjykatës se Shishimarin meriton një dënim të përjetshëm për vrasjen e bashkëshortit të saj, por shtoi se nuk do ta kishte problem nëse ai do të shkëmbehej si pjesë e një shkëmbimi të mundshëm të të burgosurve me Rusinë për mbrojtësit ukrainas të dorëzuar të fabrikës së çelikut Azovstal në Mariupol.

Prokurori kërkoi dënim të përjetshëm për Shishimarin dhe gjykimi u shty për të premten.

Shishimarin, një anëtar i kapur i një njësie tankesh ruse, po ndiqet penalisht sipas një seksioni të kodit penal të Ukrainës që trajton ligjet dhe zakonet e luftës.

Ndërsa rasti inaugurues i krimeve të luftës në Ukrainë, ndjekja penale e Shishimarin po vëzhgohej nga afër.

Hetuesit kanë mbledhur prova të krimeve të mundshme të luftës për t’i sjellë përpara Gjykatës Penale Ndërkombëtare në Hagë./Shqip.com