Pozita e opozita vlerësojnë punën e Kuvendit, kërkohet më shumë efikasitet

Deputetja e Lëvizjes Vetëvendosje, Jeta Statovci ka folur lidhur me punën e Kuvendit gjatë vitit 2022 dhe atë se çfarë pret në vitin 2023.

Statovci ka thënë për EO se pritet që të miratohen tri projektligje që kanë impakt për ekonominë e vendit.

“Mendoj që në kuadër të vitit të kaluar një dinamizëm të lartë në raport me ligjet e kaluara, pra tërësisht afër 111 ligje e të cilat kanë kaluar në dy lexime dhe 49 ligje të cilat janë në procedurë e sipër, dhe besoj se si hap i parë do të jetë finalizimi në raport me projektligjet janë në procedurë, mirëpo në kuadër të dikastereve një fokus të veçantë do të kemi në raport me ekonominë dhe shëndetësinë. Në kuadër të Ministrisë së Tregtisë dhe Industrisë e cila raporton në komisionin ku jam nënkryetare kemi Ligjin për Investime e të cilat pritet të vijnë dhe ligjin për ndërmarrësi, i cili pritet të vijë. Ndërsa pritet të vijë edhe projektligji për Burime të Ripërtritshme. Këto tri ligje kanë impakt direkt në ekonomi”, u shpreh Statovci.

Prioritet sipas Statovcit do të ketë edhe shëndetësia. Fokus më të madh, thotë se do t’i japin nivelizimit të çmimeve të barnave.

“Fushë tjetër mjaftë e rëndësishme e cila kërkon fokusin e nevojshëm është edhe shëndetësia. Në kuadër të legjislacionit është padyshim edhe nivelizimi i çmimeve të barnave, gjithashtu edhe ligjet tjera që e presin edhe funksionimin e sektorit, ku këtu jam edhe vet shumë kurioze që të shoh materialin e përgatitur dhe të shoh mundësinë e kontributit ndërmjet dy lexime. Për finalizim e tutje jemi në pritje të planit legjislativ për vitin 2023, dhe besoj se pas marrjes së atij plani do të shohim mundësitë se cilat nga ligjet të cilat i vlerësojmë se janë të nevojshme mund të inicohen edhe nga ana e deputetëve”, u shpreh Statovci.

Ndërsa për dështime të seancave shkaku i kuorumit, Statovci pret më shumë përkrahje nga opozita.

“Po kuorumin nënkupton votimin dhe nuk do të thotë se duhet të jetë votim vetëm nga ana e pozitës por pritet të jetë edhe nga ana e opozitës. Ne shohim se në shumicën e seancave kemi mosparticipim total nga ana e opozitës, dhe kështu që barra e sigurimit të kuorumit bie tërësisht në pozitën. Përveç materialit që sjellët nga ana e Qeverisë, materiali që trajtohet nga ana e komisioneve për t’u bartur në seancë, ne shohim që barra e tërësishme në raport me kuorumin, pritet vazhdimisht që të jetë nga ana e pozitës, kurse nga ana e opozitës kanë një raport të përgjegjësisë në raport me interesin qytetar, shohim se nuk kanë qëndrim për e as kundër, duke tentuar që të ketë një bllokadë”, u shpreh Statovci, duke thënë se këtë sesion presin më shumë bashkëpunim me opozitën”.

Ndërsa deputeti i Partisë Demokratike të Kosovës, Hajdar Beqa ka thënë se pret që legjislacioni të jetë më efikas.

“Realisht presim që legjislacioni të jetë më efikas, përmbajtjesor e mos të ngutet për numra por në secilin ligj të kemi strategjinë legjislative, dhe të merren edhe akterët tjerë dhe të mos bëhen ligje për shembull në fushën e drejtësisë pa akterë të drejtësisë apo në fusha tjera pa akterë përgjegjës, por në të njëjtën kohë ne si PDK kemi edhe një plan që do të kemi disa nisma ligjore që me kohë do t’a informojmë opinionin publik dhe presim me qenë më efikas Kuvendi në cilësi e jo vetëm në sasi”.

Kurse, Naim Jaka nga Instituti i Kosovës për Drejtësi ka thënë se 85 për qind e seancave nuk kanë përfunduar si dhe barra kryesore për të siguruar korum, bie të mazhoranca.

“Kuvendin e karakterizon një atmosferë e polarizume ndërmjet grupeve parlamentare që përfaqësohen në Kuvendin e Kosovës. Kuvendi nuk ka transparencë të mjaftueshme, për arsye se mungon votimi elektronik, sot qytetarët e Kosovës edhe shoqëria civile nuk e dinë se cili është qëndrimi politik i një deputeti përmes votimit për një ligj të caktuar, ka seanca të papërfunduara me mbi 85 për qind, ka pika të rendit të ditës që janë shqyrtuar në dy apo tri seanca por nuk kanë arrit deri te votimi për shkak të mungesës së kuorumit, dhe ky kuorum nuk po plotësohet për shkak të opozitës por më shumë për arsye të mazhorancës, dhe kjo për neve është tepër shqetësuese”, u shpreh Jakaj, duke thënë se transparenca e Kuvendit lë shumë për të dëshiruar.

Shqetësuese për të është edhe mostranspemtimi i mbledhjeve të Komisioneve. Me këtë rast, Jakaja kërkon që Kuvendi të gjejë një zgjidhje.