Polonia vendi i parë i NATO-s që pritet të dërgojë avionë luftarakë në Ukrainë

Polonia u zotua të enjten se do të dërgojë katër avionë luftarakë MiG-29 në Ukrainë, anëtari i parë i NATO-s që e bën këtë, në një lëvizje të rëndësishme në betejën e Kievit për t’i rezistuar sulmit të Rusisë.

Presidenti Andrzej Duda tha se avionët – nga rreth një duzinë që kishte trashëguar nga ish-Republika Demokratike Gjermane – do të dorëzon në ditët në vijim pasi të ishin servisuar.

“Kur bëhet fjalë për aeroplanët MiG-29, të cilët ende operojnë në mbrojtjen e hapësirës ajrore polake, është marrë një vendim në nivelet më të larta, mund të themi me besim se po dërgojmë MiG në Ukrainë”, tha Duda.

Njoftimi se Polonia do të dërgojë avionët e projektuar nga sovjetikët shënon një shkëputje nga aleanca dhe mund të ushtrojë presion mbi shtetet e tjera anëtare për të bërë të njëjtën gjë. Vendet e tjera të NATO-s kanë hezituar të lëvizin përtej një vendimi në fillim të këtij viti për të dërguar tanke në Kiev.

Duke folur në një konferencë shtypi në Varshavë me homologun e tij të ri çek, Petr Pavel, presidenti polak shprehu mbështetjen e përbashkët të dy vendeve për Kievin.

“Republika Çeke dhe Polonia janë vende që janë në pararojë absolute kur bëhet fjalë për mbështetjen e Ukrainës, si në nivel humanitar ashtu edhe në atë ushtarak,” tha Presidenti Duda.

Polonia ka qenë një nga vendet evropiane më të zëshme kundër Rusisë – edhe para pushtimit të Ukrainës. Rusia shihet ende nga shumë njerëz në qarqet politike dhe diplomatike të Polonisë në një kontekst të Luftës së Ftohtë, shkruan CNN.

Putini është parë gjithmonë nga Varshava si i pabesueshëm dhe zgjerimi i Rusisë është diçka që duhet luftuar me çdo kusht.