Policia u sulmua dje në veri, thotë ministri Sveçla

Ministri i Ponëve të Brendshme, Xhelal Sveçla, tha se policia është sulmuar dje sërish në veri të vendit.

Ai në takimin e Këshillit për Demokraci dhe të Drejta të Njeriut, shtoi se nga sulmi, është rrezikuar jeta e një polici.

Sipas tij, së fundi situata e sigurisë është përmirësuar ndjeshëm në veriun e vendit.

“Atje institucionet e sigurisë janë ballafaquar me sulme ekstremiste, sulmi i 24 shtatorit u menaxhua mjaft mirë edhe pse humbëm heroin Afrim Bunjakun”.

“Gjatë këtyre viteve Policia e Kosovë është sulmuar rreth 100 herë nga këto grupe ekstremiste dhe lajmi i fundit është se një sulm kemi pasur edhe dje ku është rrezikuar jeta e një polici. Megjithatë situata e sigurisë atje është përmirësuar ndjeshëm”, tha ai.

Sfida më e madhe për këtë vit sipas tij, ka qenë ruajtja e rendit dhe sigurisë publike dhe ruajtja e integritetit territorial në gjithë vendin.

Madje, ai tha se tejet sfiduese ka qenë shtrirja e sovranitetit në veriun e vendit pas sulmit të grupeve paramilitare atje dhe kulmi i këtyre sulmeve ka qenë ai i 24 shtatorit.