Për 11 muaj, ish-ministri Latifi me kabinet, shpenzuan rreth 20 mijë euro për 7 vizita zyrtare

Për 11 muaj sa qëndroi në krye të Ministrisë së Shëndetësisë, Rifat Latifi zhvilloi shtatë vizita zyrtare jashtë vendit.

Vizitat i realizoi në 5 shtete të ndryshme si: Austria, Turqia, Greqia, Norvegjia dhe Shqipëria.

Të gjitha këto me qëllim të vendosjes së bashkëpunimit dhe marrjen e praktikave më të mira shëndetësore.

Por, qëllimet nuk u quan deri në fund, pasi pa mbushur as 1 vit nga marrja e detyrës, Latifi dha dorëheqje.

Nga dokumentet e siguruara nga Shqip.com, rezulton se vetëm për Latifin, vizitat i kushtuan buxhetit të shtetit 2 mijë e 461 euro për akomodim në hotel dhe para xhepi, ndërsa 2 mijë e 988 euro për bileta udhëtimi.

Por, Latifi nuk shkoi vetëm në këto vizita.

I shoqëruar ishte dhe nga anëtarë tjerë të kabinetit.

Kjo ka bërë që shuma e mjeteve të shpenzuara për qëndrim në hotel dhe para xhepi, të kalonin në mbi 11 mijë euro, ndërsa për bileta udhëtimi mbi 7 mijë euro.

“Nga marrja mandatit të ministrit Latifi, shpenzimet e përgjithshëm të Kabinetit të Ministrit, duke përfshi ministrin e Shëndetësisë, zëvendësministrat, këshilltarët politik dhe vozitësit, në total janë 11,263.37”, thuhet në përgjigjen e MSH-së për Shqip.com.

Dy javë para dorëheqjes ish-ministri qëndroi disa ditë në Greqi

Latifi dha dorëheqje nga pozita e ministrit, pak javë pas zhvillimit të vizitës në Greqi, më 22 shtator.

Derisa, dorëheqja e tij iu ofrua kryeministrit, Albin Kurti, më 6 tetor.

“Gjatë vizitës në spitalet e lartpërmendura, ministri Latifi tha se shëndetësisë në Kosovë i duhet ndihma e partnerëve ndërkombëtarë për t’u zhvilluar, si ajo e shtetit të Greqisë dhe të tjerëve që kanë shprehur gatishmërinë e tyre për të mbështetur në çdo aspekt”, kështu kishte shkruar Latifi në llogarinë në Facebook të Ministrisë së Shëndetësisë.

Megjithatë, ai dha dorëheqje duke publikuar një listë të mangësive në sistemin shëndetësor, përfshirë mungesën e informimit, infrastrukturës spitalore, humbjen e besimit të donatorëve, etj.