Pas ndalimit për 48-orë, avokati Besnik Berisha merr trajtim në Kardiologji

Avokatit Besnik Berisha është duke marr trajtim në Klinikën e Kardiologjisë në Qendrën Klinike Universitare të Kosovës.

Trajtimin e tij në Kardiologji e ka konfirmuar edhe QKUK-ja. “QKUK konfirmon se po merr trajtim në Klinikën e Kardiologjisë”, thuhet në përgjigjen e QKUK-së, raporton Koha.

Ai është dërguar për trajtim atje pasi që i është caktuar masa e ndalimit për 48 orë.

Berisha bashkë me tre persona të tjerë është arrestuar të enjten në një aksion që është realizuar me urdhëresë të Gjykatës Themelore në Ferizaj.

Prokuroria Themelore ka njoftuar se ata dyshohen për veprat penale “Dhënia e ndihmës kryesve pas kryerjes së veprave penale”, “Pengimi i të provuarit apo procedurës zyrtare” dhe “Ushtrim i ndikimit”.

Prokuroria ka njoftuar se janë kontrolluar e pastaj edhe sekuestruar përkohësisht shtëpitë dhe lokalet përcjellëse të katër të arrestuarve dhe dy personave të tjerë të dyshuar.

Sipas Policisë të arrestuarit e tjerë përveç Berishës janë personat me iniciale N.Xh., I.S. dhe R.C..