Osmani në takim me presidentin e Maqedonisë së Veriut: Sa më shpejtë të bëhemi pjesë e BE-së, do të pengohet ndikimi rus në rajon
Presidentja e Kosovës, Vjosa Osmani është takuar me presidentin e Maqedonisë së Veriut, Stevo Pendarovski.
Ky takim është zhvilluar në kuadër të Forumit të Prespës për Dialog që po mbahet në Ohër.
Gjatë këtij takimi, Osmani ka rikonfirmuar raportet e shkëlqyera në mes të Kosovës dhe Maqedonisë së Veriut, mbështetjen e ndërsjellë drejt integrimit evropian si dhe qëndrimin e përbashkët në raport me situatën e sigurisë në Evropë.
Osmani ka thënë se sa më shpejtë të bëhen pjesë e BE-së, aq më shumë do të pengohet ndikimi rus në rajon
“Sa më shpejtë që vendet e përkushtuara të Ballkanit Perëndimor të bëhen pjesë e BE-së, aq më shumë do të pengohet ndikimi rus në rajon nëpërmjet satelitëve të saj. Me presidentin Pendarovski do ta vazhdojmë komunikimin e ngushtë për t’i përafruar dy vendet tona”, ka theksuar Presidentja Osmani.
Me ftesë të Presidentit Pendarovski, Presidentja Osmani po merr pjesë në Forumin e Prespës për Dialog me temë: Formësimi i të ardhmes së Ballkanit Perëndimor në arkitekturën bashkëkohore evropiane të sigurisë.
Gjatë këtij forumi, Osmani është takuar edhe me të dërguarin e posaçëm të Shteteve të Bashkuara, Gabriel Escobar, të dërguarin e posaçëm të Mbretërisë së Bashkuar, Stuart Peach si dhe me të dërguarin e posaçëm të Gjermanisë, Manuel Sarrazin./Shqip.com