Osmani në Portugali: Synimi primar i Kosovës është anëtarësimi në BE, NATO, INTERPOL
Presidentja e Kosovës, Vjosa Osmani, tha se synimi primar i vendit është anëtarësimi në Bashkimin Evropian, NATO, INTERPOL dhe organizata tjera ndërkombëtare, përcjell Shqip.com.
Këto deklarata ajo i ka bërë në vizitën e saj në Portugali ku ka takuar ministrin e Brendshëm, Eduardo Cabrita dhe pjesëtarë të forcave të rendit të këtij shteti, që kanë shërbyer në Kosovë.
Sipas njoftimit të Presidencës, Osmani ka theksuar se Policia e Kosovës në nivel ballkanik e ka besimin më të lartë të qytetarëve Kosovës.
“Ajo ka vlerësuar marrëdhëniet ndërmjet të dy shteteve, duke u angazhuar për hapjen e një kapitulli të ri bashkëpunimi. Presidentja Osmani ka theksuar se Policia e Kosovës në nivel ballkanik e ka besimin më të lartë të qytetarëve të Kosovës. Në këtë kontekst, Presidentja Osmani ka kërkuar nga ministri Cabrita të shkëmbehen përvojat, në mënyrë që Policia e Kosovës të përfitojë nga ajo portugeze.
Më tej, në këtë takim, Presidentja Osmani ka theksuar se Kosova është e orientuar qartë në rrugën e saj evropiane dhe se synim primar mbetet anëtarësimi në BE, NATO, INTERPOL dhe organizata të tjera ndërkombëtare”, thuhet në njoftim.
Tutje, Osmani ka falënderuar Portugalinë që është zë i fuqishëm në përkrahje të liberalizimit të vizave dhe të procesit të anëtarësimit në organizata ndërkombëtare./SHQIP.com