Nuk deklaroi dënimin në Greqi, KQZ fal kryebashkiakun socialist – irritohet Lefter Maliqi: Turp!

Komisioni Qendror i Zgjedhjeve shqyrtoi këtë të martë shkresën e Prokurorisë ku rezultoi se kryetari i Bashkisë së Kuçovës, Kreshnik Hajdari rezultonte i dënuar në Greqi, dënim të cilin ai nuk e ka deklaruar.

Kreu i KQZ-së, Ilirjan Celibashi tha se shkelja ligjore nuk përbën shkak për të ndërprerë mandatin, kjo pasi vepra për të cilën është dënuar Hajdari, kalim i paligjshëm i kufirit, nuk e ndalon atë të marrë funksione publike.

“Ne jemi para një fakti ku subjekti vetëdeklaruar tashmë kryetar i Bashkisë së Kuçovës ka paraqitur formularin e vetëdeklarimit. Në vlerësimin e tij, ai nuk ka paraqitur një të dhenë që lidhet me një proces penal apo administrativ në një kohë të caktuar të zhvilluar në territorin e Greqisë. Në vlerësimin e tij, kjo ka qenë e panevojshme për t’u deklaruar. Ajo që ka rëndësi është që kjo e dhënë nuk e përfshin atë në kushtet e ndalimit për shkak të veprës penale për të cilën e ka vendimin përkatës. Ngelet për t’u diskutuar pse ai nuk e ka deklaruar.

Në çdo rrethanë ka pasur detyrimin për ta deklaruar. Edhe në respektim të precedentëve të krijuar nga ky institucion që prej vitit 2020, ne kemi mbajtur qëndrim që nuk ka detyrim subjekti vetëdeklarues për të paraqitur në formularin e vetëdeklarimit rrethana dhe shkaqe që nuk e ndalojnë atë të marrin drejtimin e institucioneve publike”, tha midis të tjerash kreu i KQZ.

“Ndaj vlerësoj që nuk ka një shkak ligjor që kryetari i Bashkisë Kuçovë t’i ndërpritet mandati”, nënvizoi Celibashi.

Pas mbarimit të seancës kur KQZ vendosi të mos i ndërpresë mandatin, ish-kandidati i Koalicionit “Bashkë Fitojmë” në Kuçovë, Lefter Maliqi e konsideroi një turp.

“Ne do të vazhdojmë betejën tonë deri në Strasburg. Turp e faqja e zezë. Është një turp dhe një skandal. Ky që bën ky është turpi më i madh i Shqipërisë.

E kemi miratuar vetë në Parlament që kur nuk deklaron i ndërpritet mandati. Këta nuk pyesin as për Parlament, as për Gjykatë të Lartë dhe as për Gjykatë Kushtetuese”, tha midis të tjerash Maliqi.