Një seri dramash – në Serie A

Drama e quajtur “Serie A” mori fund – të dielën.

Qyteti i Milanit – u nda në dy pjesë: njëra anë festonte, tjetra ishte e mërzitur.

Disa skuadra patën sezon dëshpëruese, e diku tjetër u rikthye shpresa.

Perdet u mbyllën.

Vuajtjeve të rosonerëve i erdhi fundi

Pa blerje që kapin vlera astronomike, pa paga që prekin zenitin, por me shumë pasion dhe dashuri për fanellën.

Kuqezinjët e zotërojnë përsëri futbollin në Itali.

AC Milan u shpall kampion i Series A – pas 11-të viteve.

Një sezoni me ngritje dhe zbritje i erdhi fundi, teksa forma e lartë u vulos me një fitore 0-3 në udhëtim te Sassuolo.

Stefano Pioli e arriti misionin.

Lëvizja e gabuar – neurazurët të heshtur

Në fillim të sezonit 2021-22, Hakan Hakan Çalhanoglu u largua nga Milani – për te fqinjët e qytetit.

Por, kjo doli të jetë lëvizje e gabuar.

Mesfushuri turk së bashku me shokët e skuadrës e mbyllën sezonin në vendin e dytë.

Teksa, edhe nga Liga e Kampionëve u përshëndetën herët.

Një “ngushëllim” për zikaltërit është fakti që e fituan Kupën e Italisë.

Duarthatë – pa kapitenin

Napoli e mbylli edhe një sezon pa titull në Serie A.

Ani pse skuadra e udhëhequr nga Luciano Spalletti e nisi mirë sezonin dhe qëndroi disa xhiro në krye të tabelës – historia e vjetër u përsërit.

Napoletanët e mbyllën kampionatin me duarthatë – në pozitën e tretë.

Teksa, nga “Diego Armando Maradona Stadium” u largua edhe kapiteni – Lorenzo Insigne.

Një kapitulli të gjatë më shumë se një dekadë i erdhi fundi.

“Zonja e vjetër nuk e gjeti lumturinë”

Largimi i Cristiano Ronaldos nga Torino – la zbrazëti të mëdha.

Ani pse Allegri u rikthye në stolin e trajnerit, kjo nuk i zgjidhi problemin.

Juventusi e mbylli sezonin – në pozitën e katërt – pa asnjë trofe.

Herët u eleminuan edhe nga Championsi – ku ishin vetëm “turistë”.

Kampionati i ri – është shpresë për Juven, por drita nuk po shihet në fund të tunelit.

Lazio do luaj përsëri të enjteve

Në fillim të kampionatit – Lazio shihej si një skuadër konkuruese.

Kur – Sarri e mori timonin, ëndrrat për kualifikim në Ligën e Kampionëve u ngjallën.

Por, jo.

Vendi i pestë në tabelë është realiteti i këtij ekipi.

Madje, edhe këtë pozitë mezi e siguruan.

Europaliga po i pret.

Mourinho e ktheu shpresën në kryeqytet

“The Special One” nuk e kualifikoi dot Romën në Champions, ama në “Stadio Olimpicio” u rikthye shpresa.

Ulëse të zbrazëta nuk ka më.

Trajneri portugez e drejtoi këtë skuadër për në finale të Europa Conference League.

Nëse romakët arrijnë të triumfojnë në Tiranë – ndaj Feyneoordit – ky do ishte një sezon debutues i suksesshëm.

Futbollisti më i dalluar pa asnjë dyshim ishte Tammy Abraham – që e mbylli sezonën me 17 gola në Serie A.

Dëshpërim total i Atalantës

Në krye me Gian Piero Gasperini, Atalanta ka qenë skuadër tejet konkuruese në sezonet e fundit.

Madje, e shijuan edhe gjysmëfinalen e Ligës së Kampionëve.

Por, ky kampionat doli të jetë një dëshpërim i vërtetë.

Vendi i tetë është i barabartë me asgjë: as Champions, as Europaligë, as Europa Conference League.

Faturën mund ta paguaj Gasperini.

Genoa u dorëzua

15-të vite radhazi qëndruan në elitën e futbollit italian.

Kjo ishte seria më e gjatë në histori të tyre, por kësaj “aventure” i erdhi fundi.

Genoa nuk arriti të siguronte mbijetesën në Serie A dhe do të garojë në kategorinë e dytë të futbollit italian.

Për ekipin më të vjetër të futbollit në Itali – kjo ishte një kafshatë që nuk kapërdihet lehtë.

Serie B është realiteti i ri.

Në qiellin e shtatë

Sezoni ndryshon, por jo edhe Ciro Immobile.

Sulmuesi italian e mbylli edhe një sezon fenomenale – në nivel individual – me plot 27 gola.

Më së shumti në Serie A.

32 vjeçari ka kontratë me “Le Aquile” deri në vitin 2026 dhe duket që nuk e ka ndërmend të largohet – ani pse ofertat nuk i kanë munguar. 

Mr. Assist

Saussolo nuk pati sezon për tu mbajtur mend.

Por, e njëjta nuk mund të thuhet edhe për Domenico Berardi.

Majtaku regjistroi më së shumti asistime në Serie A – gjithsej 14-të.

Teksa, rrjetën e tundi 15-të herë.

Ai e dëshmoi edhe një herë se nuk ftohet rastësisht në kombëtaren italiane.

Muri i quajtur “Mike Maignan”

Në Francë u shpall kampion dhe portieri më i mirë ne Ligue 1.

Por, ai nuk ishte i kënaqur. Veten vendosi ta sfidonte edhe në Serie A.

Ai zbarkoi në “San Siro” – kur Gianluigi Donnarumma u largua dhe kishte të madh në supe.

Ama, Maignan nuk u ndal. E njëjta histori si në Francë e përcolli edhe në Itali.

U shpall kampion dhe portieri më i mirë.

Shumë herë ishte hero i rosonerëve dhe 17-të ndeshje i mbylli pa pranuar gol. /Shqip.com