Një metër kub dru kushton nga 75-100 €

Në kohën kur dimri po afron, nevoja për ngrohje me dru, pelet, rrymë e forma të tjera, rritet. Por, në këtë vit edhe çmimet e tyre janë rritur. “Një metër kub dru aktualisht kushton nga 75 deri në 100 euro, varësisht nga cilësia”, kështu bëri të ditur Avni Murtezi, një nga tregtarët në vend ku dha arsyet e rritjes së çmimit të druve, raporton RTK.

“Për ne bizneset është ngecje për 6 muaj që do të presim deri sa të pajisemi me fletpërcjellëse për prerje të druve. Pastaj është edhe fuqia punëtore. Nuk ka interesim për këtë punë. Duke parë edhe rritjen e çmimeve të karburantit, kanë ngrit edhe çmimet”, deklaroi Murtezi.

Tutje, sipas tij, një ton pelet kushton deri në 700 euro. Edhe në këtë çmim thotë se kanë ndikuar shumë faktorë. “Është edhe faj i institucioneve që nuk kanë punuar me kohë në masat preventive. Masat u deshtë të merren: lejimi më i madh i mases drunore, mos të ketë import”, shtoi ai.

Qytetarët tregojnë se çfarë alternativash po përdorin për ngrohje, teksa çmimet i shohin tejet të larta. “Me dru e me pelet ngrohemi. Shtrenjtë janë të gjitha”, tha Adem Ademi.

Kurse ngrohja me thëngjill, edhe pse e dëmshme për mjedisin, mbetet si alternativë, pas krizës energjetike dhe çmimeve të larta të druve dhe peletit.