Nagavci: 39 nga 250 aplikantë për inspektorë të arsimit e kanë kaluar rishikimin administrativ

Ministrja e Arsimit, Arbërie Nagavci, ka njoftuar se nga 250 persona që kanë aplikuar për inspektorë të arsimit, vetëm 39 e kanë kaluar rishikimin administrative.

Ajo në një postim në Facebook tha se të njëjtit kanë plotësuar kriterin për të vijuar në fazën e dytë të rekrutimit.

“Me kërkesë të Ministrisë së Arsimit, në bazë të legjislacionit në fuqi, Ministria e Punëve të Brendshme ka hapur konkursin për rekrutim të jashtëm të 20 inspektorëve të arsimit. Konkursi ka qenë i hapur nga data 23.11.2022 deri më 07.12.2022. Nga Divizioni përkatës në MPB i cili e ka bërë rishikimin e aplikimeve, kemi pranuar njoftimin se nga 250 aplikantë vetëm 39 e kanë kaluar rishikimin administrativ duke plotësuar kështu kriterin për të vijuar në fazën e dytë të rekrutimit.

Të gjithë kandidatët që nuk e kanë kaluar rishikimin administrativ të aplikacioneve, janë njoftuar individualisht përmes emailit për arsyet e moskualifikimit për fazën tjetër të rekrutimit”, ka shkruar ajo.

Tutje, ajo tha se afati i ankesave është deri me 10 janar.

“Afati i ankesave është deri më 10 janar, andaj inkurajoj të gjithë aplikantët që kanë shqetësime për këtë fazë të shqyrtimit administrativ të dokumentacionit, t’i paraqesin ankesat online ose në kopje fizike brenda afatit të ankesës”.