Nacionalisti pro-rus bëhet kreu i inteligjencës në Serbi

Ai është një nga politikanët e paktë evropianë që ka vizituar Moskën që nga fillimi i luftës në Ukrainë. Ish-ministri i Brendshëm i Serbisë Aleksandar Vulin konsiderohet pro-rus dhe tani është shefi i ri i inteligjencës së vendit. Ai i quan sanksionet perëndimore “histeri anti-ruse”, shkruan NTV.

Serbia ka emëruar ish-ministrin kontrovers të Brendshëm Aleksandar Vulin si shefin e ri të inteligjencës. Këtë e ka bërë të ditur transmetuesi shtetëror serb RTS. Nacionalisti pro-rus është një nga të paktët politikanë të lartë evropianë që viziton Moskën që nga fillimi i luftës në Ukrainë.

Serbia ka dënuar luftën e agresionit të Rusisë kundër Ukrainës, por refuzon t’i bashkohet sanksioneve perëndimore kundër Moskës. Serbia “nuk do të jetë pjesë e histerisë anti-ruse”, thotë Vulin.

Vulin është një ish-ministër i mbrojtjes dhe i njohur për shpërthimet e tij nacionaliste, të cilat shpesh kanë çuar në konflikte me vendet fqinje. Në gusht, 50-vjeçari i besuar i presidentit serb Aleksandar Vuçiç u takua me Ministrin e Jashtëm rus Sergei Lavrov në Moskë.

Serbia ka aplikuar për anëtarësim në BE që nga viti 2012. Vendi ballkanik është pothuajse 100 % i varur nga gazi rus. Përveç kësaj, Serbia mund të llogarisë në mbështetjen e të drejtës së vetos së Rusisë në Këshillin e Sigurimit të OKB-së kur është fjala për Kosovën. Beogradi e konsideron Kosovën, e cila shpalli pavarësinë nga Serbia në vitin 2008, si një krahinë të shkëputur.