Mustafa për Osmanin: Një presidente e tillë nuk i duhet vendit

Ish-kryetari i Lidhjes Demokratike të Kosovës, Isa Mustafa, ka kritikuar veprimet e presidentes Vjosa Osmani, duke thënë se “një presidente e tillë nuk i duhet vendit”.

Sipas tij, veprimet e Osmanit si presidente janë të njëanshme dhe joligjore, ndërsa ka shtuar se “akoma vepron si me qenë pjesë e Lëvizjes Vetëvendosjes”.

“Mendoj se duhet ta ndërrojë këtë qëndrim dhe të kalojë në një qëndrim neutral në mënyrë që secili ta shohë veten se ka përkujdesjen dhe sigurinë e presidentes së vendit”.

“Nëse punon në një kanal presidentja, kryeministri dhe kryeparlamentari atëherë është rrezik për vendin sepse s’ka kush i amortizon disa vendime që për qytetarët, të cilat për subjektet politike mund të mos jenë të volitshme”, është shprehur Mustafa në një intervistë për Klan Kosovën.

Ish-lideri i LDK-së ka përmendur edhe vendimin e Osmanit për ta shkarkuar Valdete Dakën nga posti i kryetares së Komisionit Qendror të Zgjedhjeve.

Ka thënë se “s’ka qenë unifikuese kur ka marrë vendim për kryetaren e KQZ-së, sepse nuk merren vendimet e tilla”.

“Shkelje e drejtëpërdrejtë e ligjit dhe Kushtetutës, sepse s’ka pasë të drejtë të marrë këtë vendim. S’e kam parë që ka qenë unifikuese edhe në kontaktet me grupet parlamentare dhe me partitë politike”.