Mustafa i kërkon Osmanit të mbledhë Këshillin e Sigurisë

Ish-kryeministri i Kosovës, Isa Mustafa, i ka bërë thirrje presidentes Vjosa Osmani, të mbledhje Këshillin e Sigurisë pas situatës së krijuar në veri të vendit.

Sipas tij, duhet të ndërmerren masat e nevojshme duke u koordinuar me partnerët: Shtetet e Bashkuara të Amerikës, Bashkimin Evropian, KFOR-in dhe institucionet relevante në Kosovë.

Kjo pasi Mustafa thotë se “situata në veri është serioze dhe e rrezikshme”.

Ndaj, shton se është sjellje joserioze dhe e pafalshme që krerët e shtetit po dërgojnë mesazhe prej vendeve të tjera. Në një situatë të tillë sipas Mustafës, ata do të duhej të ishin në Kosovë.

“Situata në veri të Kosovës është tepër serioze dhe e rrezikshme. Në një situatë të tillë , Presidentja, Kryeministri dhe Kryeparlamentari duhet të jenë në Kosovë. Nuk mund të dërgojnë mesazhe, njëra nga New Yorku, tjetri nga Shkupi e nga Budapesti, kurse Njësitë Speciale të Policisë të Kosovës të mbesin të mbërthyera në Jarinje e Bërnjak nën kërcënimin e helikopterëve, avionëve e tanksave të Serbisë. Kjo sjellje është joserioze dhe e pafalshme”, ka shkruar tutje ai.

Mëngjesin e së shtunës në Komunën e Zubin Potokut është djegur ndërtesa e Qendrës së Regjistrimit të Automjeteve, ndërsa ajo në Zveçan është sulmuar.

Incidentet kanë ndodhur në ditën e gjashtë të protestës nga serbët e Kosovës në veri, të cilët po kundërshtojnë vendimin e Qeverisë së Kosovës për reciprocitetin me targat e veturave nga Serbia.

Tash e tutje veturat me targa serbe kur futen në Kosovë, duhet të marrin targa të përkohshme RKS në çdo pikë kufitare. Qeveria e Serbisë ka mbi 10 vjet që aplikon këtë masë për targat e Republikës së Kosovës./SHQIP.com