Musk përplaset me Apple për reklamat në Twitter

Elon Musk ka thënë se Apple ka ndaluar shumicën e reklamave të saj në Twitter dhe ka akuzuar kompaninë se kërcënon të heqë platformën nga dyqani i saj i aplikacioneve.

Mosmarrëveshja vjen pasi shumë kompani kanë ndaluar shpenzimet në Twitter për shkak të shqetësimeve rreth planeve të Musk për moderimin e përmbajtjes për faqen.

Musk ka thënë se Twitter ka parë një rënie “masive” të të ardhurave, duke fajësuar aktivistët për presion ndaj reklamuesve.

Në një seri postimesh në Twitter të hënën, ai akuzoi Apple për “censurë” dhe kritikoi politikat e saj, duke përfshirë tarifën që vendos për blerjet e bëra në dyqanin e saj të aplikacioneve, raporton BBC.

Musk, i cili bleu Twitter për 44 miliardë dollarë muajin e kaluar, është nën presion pasi disa kompani ndalojnë shpenzimet.