Murati tregon se si mund të aplikoni për të përfituar nga 300 euro për gjashtë muaj nga Qeveria

Ministri i Financave, Punës dhe Transfereve, Hekuran Murati, ka prezantuar skemën e re në kuadër të masave të punësimit, për qytetarët.

Ai ka thënë se Qeveria synon që të garantojë që çdo familje të ketë së paku një anëtar të punësuar.

Në konferencën për medie të hënën, Murati ka thënë se shteti do të subvencionojë deri në 70 për qind pagën, pra deri në 300 euro për periudhën gjashtë mujore.

“Kemi edhe një masë të për punësimin e mbajtësve të familjes. Si Qeveri jemi munduar të marrim masa për t’u dalë në ndihmë qytetarëve. Kemi dorëzuar në kuvend edhe ligjin për pagë minimale dhe marrëveshjen për reformën e skemës sociale. Bizneset që janë të interesuar të punësojnë mbajtës të familjes do t’i mbështesim deri në 70 për qind të pagës bruto. Ne do t’i publikojmë kriteret dhe ata persona që nuk kanë të punësuar duhet të lajmërohen në agjencinë për punësim dhe të tregojnë për cilat fusha kanë aftësi”, ka thënë Murati.

Shefi i kuletës së shtetit ka bërë të ditur se kushti kryesor për të përfituar nga kjo skemë është që punëkërkuesi të mos e ketë të punësuar asnjë anëtar të familjes.

“Duhet të regjistrohen në zyra rajonale dhe të sjellin kopje e letërnjoftimit të pronarit. Punëkërkuesit duhet të jenë 18 deri 64 vjeç dhe të mos kenë asnjë anëtar të familjes të punësuar. Duhet të sjellin kopje të letërnjoftimit, diplomës dhe CV-në. Të gjitha mund të bëhen pjesë e kësaj skeme dhe që nga sot dhe po realizohet një premtim më tepër i kësaj qeverie dhe synimi është të rrisim vende pune”, ka thënë ai.

Theksojmë se kryeministri i Kosovës, Albin Kurti, ditë më parë ka prezantuar masën e re “Qeveria për Familjet”.

Ai ka bërë të ditur se nga e hëna, në kuadër të masave të punësimit synojnë të garantojnë që çdo familje në vend të ketë së paku një të punësuar.

Shefi i Qevrisë ka deklaruar se kushti i vetëm për të përfituar nga kjo skemë është që punëkërkuesi nuk ka të punësuar asnjë anëtar të familjes./Shqip.com