Murati: Opozita po tenton t’i kursej para bizneseve, me kërkesën për tatimin në pronë

Ministri i Financave, Punës dhe Transfereve, Hekuran Murati, ka thënë se opozita po e kundërshton propozimin që secilit tatimpagues t’i falen deri në 100 euro të faturës së tatimit në pronë.

Kjo pasi sipas tij, me kërkesën e opozitës që të kthehet vlerësimi i vjetër, janë biznesmenët, ndërtimtarët e tregtarët, ata që do të paguanin mijëra euro më pak për tatimin në pronë.

“Janë me qindra biznesmenë, ndërtimtarë e tregtarë, ku me vlerësimin që po kërkon opozita, secili do të paguante mijëra euro më pak. Sidomos bizneset ndërtimore, të cilat kanë në pronësi me qindra banesa që i mbajnë pa shitur, në mënyrë që artificialisht të mbajnë çmimet e larta për banesa”, ka shkruar Murati në Facebook.

Tutje ai ka renditur disa shkak-pasoja që do të ndodhnin, me propozimin e opozitës/LDK-së.

“95% e tatimpaguesve nuk do të përfitonin nga falja e tatimit në pronë; Nëse e marrim vetëm një rast të një biznesmeni ndërtimtar, me vlerësimin e vjetër do të paguante 27 mijë euro më pak tatim sesa me vlerësimin e ri – raste të tilla ka shumë; Një tjetër pronar marketesh, me vlerësimin e vjetër që po e kërkon LDK, do t’i binte të paguajë rreth 70 mijë euro më pak”, ka theksuar ministri Murati.

Shefi i kuletës së shtetit tha se si Qeveri, shumë shpejt do ta dërgojnë ligjin në Kuvend, i cili do të përfshijë edhe dispozitën e faljes së faturës së tatimit deri në 100 euro për vitin 2023, si dhe do të rrisim fleksibilitetin e komunave dhe do të bëjë tatimin progresiv për vitin 2024 e tutje, ashtu që, ata që kanë më pak të paguajnë më pak, ndërsa ata që kanë më shumë, të paguajnë më shumë, siç u shpreh ministri Murati.