Me tym të zi para objektit të Qeverisë, mbyllet protesta

Aktivistët e PSD-së kanë hequr flamujt e Kosovës përpara objektit të Qeverisë së Kosovës.

Në vend të tyre janë vendosur flamuj të bardhë. Për simbolikën e tyre ka folur Dardan Molliqaj.

Ai ka thënë se ata janë vendosur për të treguar se Kurti është dorëzuar.

“Këta flamuj u zëvendësuan në mënyrë simbolike për të treguar që kryeministri i Kosovës është dorëzuar”, ka thënë Molliqaj.

Pas këtij veprimi simbolik, Molliqaj e ka shpallur të mbyllur protestën.

Fjalimi i Dardan Molliqajt

Kreu i PSD-së, Dardan Molliqaj, ka mbajtur fjalim sot në protestën e organizuar nga kjo parti për të kundërshtuar marrëveshjen e arritur me Serbinë në Ohër.

Ai tha se kryeministri Kurti si opozitar ka përdorur Zajednicën për të sulmuar pushtetarët e atëhershëm dhe se tash po ia ndërron emrin asaj që ka pranuar.

“S’ka emër që e zëveëndëson atë që po i ndodh Kosovës. Ajo që po i ndodh Kosovës është e qartë. Është autonomi territoriale etnike për komunitetin serb në Kosovë. Po ashtu, autonomi ose zona të veçanta që kanë karakter eksterritorial përreth kishave dhe manastirëve ortodokse”.

Molliqaj tha se Kurti tentoi t’ia ndërronte emrin Zajednicës, por se e ka ndërruar mbiemrin e tij.

“Në rrugëtimin e tij për t’ia ndërruar emrin nga Zajednicë në Vetëmenaxhim, ajo që do të mbetet është ndryshimi nga Kurti në Zajednica dhe është Albin Zajednica”.

Ai tha se Qeveria Kurti pikërisht pse e ka shumicën po e ka keqpërdor interesin e asaj shumice. Derisa, Molliqaj ka përmendur edhe idenë për ndryshim kufijsh.

“Refuzimi i marrëveshjes së ripërcaktimin të kufijve, duke e etiketuar Shtëpinë e Bardhë, duke e përjashtuar Luginën e Preshevës dhe në anën tjetër duke e pranuar Zajednicën në vilën e Titos nuk është e rastësishme”.

Molliqaj tha se Kurti me këtë refuzim të kësaj ideje ka refuzuar bashkimin me Luginën.