Ministrja e Infrastrukturës në Shqipëri tregon se kur do të përfundon hekurudha Tiranë – Prishtinë

Shqipëria dhe Kosova, në mbledhjen e përbashkët të dy qeverive kanë nënshkruar disa marrëveshje bashkëpunimi.

Ministrja e Infrastrukturës dhe Energjisë, Belinda Balluku si projekt me vlera të rëndësishme kombëtare, veçoi ndërtimin e hekurudhës që do të lidhë dy vendet dhe sipas saj hekurudha mund të përfundojë brenda një harku kohor prej 4 vitesh.

Ndërtimi i hekurudhës Tiranë-Prishtinë do të krijojë mundësinë që të gjithë aksesin që Shqipëria ka në Detin Mesdhe, t’ia japi dhe Kosovës.

“Është një projekt që jo vetëm do të lidhë dy vendet me hekurudhë, por edhe përmes konceptit të dy porteve, portit të Durrësit dhe portit të thatë të Prishtinës. Është një koncept shumë modern që është zbatuar në vende shumë të zhvilluara sa i përket tregtisë”, tha ministrja e Infrastrukturës për Euronews Albania.

Balluku tha se mbetet për t’u hapur gara për të pasur një kompani fituese për realizimin e projektit.

Në mbledhjen e përbashkët të dy qeverive janë nënshkruar 19 marrëveshje në përgjithësi.