Minatorët e Trepçës: Nuk po respektohet marrëveshja që i dha fund grevës

Minatorët e Trepçës në Stantërg, pas grevës dy javore, po ankohen se marrëveshja që i dha fund grevës, nuk po zbatohet. Përveç shpalljes së konkursit për kryeshefin e ri, që edhe ishte një prej kërkesave, pikat e tjera, sipas tyre nuk po zbatohen

Diskutime të shumta e negociata mezi i dhanë fund grevës dhjetë ditore të minatorëve të Trepçës në Stantërg.

Por, gati 2 javë më vonë, minatorë e sindikalistë, kanë ankesa se kërkesat e tyre nuk janë duke u zbatuar, siç kishin marrë zotime se do të ndodhë.

Përveç hapjes së konkursit për kryeshef të ri që u bë dit me parë, çka edhe ishte një prej kërkesave të minatorëve, paga e plotë e tetorit ende nuk është ekzekutuar e as ata që u suspenduan shkaku i grevës nuk janë kthyer në punë.

Një prej të suspenduarve, është edhe Gani Osmani, që thotë se pajtimi që u arrit për t’i dhënë fund grevës, nuk po përfillet.

Osmani pretendon se edhe pas dakordimit, ushtruesi i detyrës së kryeshefit kishte suspenduar edhe gjashtë minatorë të tjerë.

“Është prishje e marrëveshje sipas vendimi tim, jo vetëm që nuk është shfuqizua vendimi, por me datën tre kur jonë dal nga miniera janë suspendua edhe gjashtë minatorë të tjerë”, ka thënë Osmani.

Sindikalistët e Trepçës, thonë se kanë ngritur shqetësimet e tyre për mos-përmbushjen e pritjeve, por nuk kanë marrë përgjigje.

“Ju kemi dërguar email po nuk po përgjigjen. Kemi kërkuar me ju përmbajt marrëveshjes që janë zotu edhe deputetët edhe drejtori për monitorim të ndërmarrjeve publike, por nuk kemi marr asnjë përgjigje”, ka thënë Ibrahim Jonuzi.

Televizioni, ka tentuar që të marrë përgjigje në lidhje me shqetësimet e ngritura nga minatorët nga Valon Prebreza, që udhëheq me Njësinë për Monitorimin e Ndërmarrjeve Publike nga Ministria e Ekonomisë.

Por edhe Prebreza, edhe anëtarë të bordit të Trepçës, nuk kanë kthyer përgjigje gjatë ditës për këtë temë.