Merret vendim që ngrohja në Prishtinë të bëhet me mazut

Ndërmarrja Publike “Termokos” njoftoi të mërkurën se ka ndërprerë furnizimin me ngrohje për të gjithë konsumatorët.

Për këtë çështje, kryetari i Komunës së Prishtinës, Përparim Rama ka mbajtur një takim urgjent në Termokos. Pas këtij takimi, kanë vendosur për opsionin e dytë, atë të ndezjes së mazutit, shkruan Shqip.com.

“Sot patëm një takim urgjent me Ndërmarrjen Publike “Termokos” lidhur me situatën e krijuar si pasojë e ndërprerjes së ngrohjes për qytetarët e Prishtinës. Morrëm vendmin e përbashkët që të futet në sistem opsioni B i ngrohjes, përmes ndezjes së mazutit”, ka shkruar Rama në Facebook.

Korporata Energjetike e Kosovës gjatë ditës së mërkurë ka njoftuar se deri të enjten e 16 dhjetorit nuk do të krijohen kushtet për furnizimin e Termokosit me avull për ngrohje qendrore.

“Korporata Energjetike e Kosovës njofton opinionin se aktualisht në TC-Kosova A  kemi një gjendje stabile, ku në punë janë të tri njësitë aktive ( A3,A4 dhe A5) qe prodhojnë rreth 390 MË/h. Ndërsa në Kosovën B, deri në mesnate sot ishte ne pune njësia B1”.

“Në këtë drejtim ju bëjmë me dije se për shkak te një rrjedhje ne kaldajën e njësinë B1, ishim të detyruar të ndalim edhe këtë në mesnatë. Ekipet e specializuara kane filluar menjëherë përgatitjet për intervenim në sanimin e gjendjes”, thuhej në njoftimin e lëshuar nga KEK-u./Shqip.com