Mediumi spanjoll: Qeveria po përgatitë një kthesë historike në raportin me Kosovën

Gazeta spanjolle “The Objective” shkruan se qeveria e këtij shteti e udhëhequr nga Pedro Sánchez është duke përgatitur një kthesë historike në qëndrimin për Kosovën.

Sipas këtij mediumi, që shpejti pritet që qeveria do të dalë me njoftim i cili do të përfshijë njohjen de facto të Kosovës nga Spanja, transmeton Shqip.com.

Për këtë raportim, “The Objective” thotë se mbështetet në burime diplomatike, të cilat thonë se mund të hapet një zyre tregtare apo kulturore në Prishtinë.

E sipas gazetës, një gjë e tillë mund të bëhet duke u bazuar në atë që kishte ngjarë  gjatë regjimit të Frankos me Bashkimin e Republikave Socialiste Sovjetike dhe vendet e tjera komuniste, pa nënkuptuar njohjen e plotë.

Por, gazeta thotë se nga Zyra për Informim Diplomatik (OID) janë përgjigjur se këto opsione nuk janë në tavolinë për momentin dhe se të tjera janë duke u shqyrtuar.

Sekretari i Shtetit për Bashkimin Evropian, Juan González-Barba , e bëri të qartë këtë të premte në një kolokium në Institutin Mbretëror Elcano mbi proceset e zgjerimit në Ballkan se Spanja nuk do ta njohë diplomatikisht Kosovën përderisa nuk ka marrëveshje dypalëshe ndërmjet Prishtinës dhe Beogradit, por për herë të parë hapi derën për të bërë një lëvizje me autoritetet kosovare.

Në këtë kuptim, numri tre i Punëve të Jashtme theksoi se Spanja dëshiron të jetë “më e përfshirë” në rajon dhe se kjo strategji do të ishte e çalë nëse Kosova vazhdon të injorohet “plotësisht”. 

“Duhet të ketë një marrëveshje kompromisi dhe ne po shqyrtojmë tani forma të ndryshme pa i njohur Shtetet Anëtare”, tha ai duke iu referuar Kosovës dhe duke matur secilën fjalë të tij në një audiencë me diplomatë dhe ambasadorë ballkanikë.

González-Barba theksoi se ky vendim spanjoll “do të merret së shpejti dhe do të shpallet”, duke lënë të kuptohet se hapi diplomatik është i pashmangshëm. 

“Sigurisht, ne do të përpiqemi të vendosim në katror rrethin. Ne duam që vendimi të kuptohet nga Serbia, partneri ynë kryesor në Ballkanin Perëndimor”, shtoi ai, duke e ditur se sa e mprehtë është kjo çështje në Beograd.

“Ne duam të kontribuojmë në përpjekjet e të gjitha vendeve anëtare dhe të të dërguarit të Përfaqësuesit të Lartë – ish-ministrit të Jashtëm sllovak, Miroslav Lajçak – për të arritur marrëveshje ndërmjet Beogradit dhe Prishtinës dhe shpresojmë që përpjekjet tona do të njihen dhe vlerësohen nga vendet e mbetura të Ballkanit”, përfundoi ai.

Spanja bën pjesë në grupin e pesë vendeve të Bashkimit Evropian që ende nuk e kanë njohur pavarësinë e Kosovës./SHQIP.com