Mbahet për herë të pestë në Berat konkursi kombëtar për çmimin “Vexhi Buharaja”

Në 104-vjetorin e lindjes së poetit, studiuesit dhe përkthyesit “Vexhi Buharaja”,emrin e të cilit mban edhe biblioteka e qytetit të Beratit, është organizuar në ambientet e kësaj biblioteke konkursi: Çmimi Letrar “Vexhi Buharaja”.

Në edicionin e 5-të të këtij konkursi morën pjesë të rinj nga Shqipëria, Kosova, Mali i Zi, Maqedonia e Veriut, Amerika etj.

Konkursi u zhvillua në kategoritë: poezi, ese e përkthime dhe pjesë e tij u bënë 52 krijues, që performuan denjësisht në fushat e përzgjedhura. Në përbërje të jurisë së këtij konkursi kanë qenë: Profesor Ymer Ciraku, poetja dhe përkthyesja Olimbi Velaj, poeti dhe përkthyesi Primo Shllaku, poeti dhe studiuesi Yzedin Hima dhe në cilësinë e kryetarit të jurisë Aleksandër Çipa, publicist, gazetar dhe kryetari i UGSH-së.

Të pranishmit në këtë event, ku vlen të përmendet rritja e cilësisë në krijime nga viti në vit, janë ndalur edhe në figurën e Vexhi Buharasë, si një vlerë e shtuar në gjerdanin e artë të vlerave njerëzore e kulturore të qytetit të Beratit, si një nga figurat e shquara që dha një kontribut të çmuar në fushën e letërsisë kombëtare dhe në atë të përkthimit, sidomos në gjuhët origjinale.

Juria dinjitoze, me emra të njohur në fushën e letërsisë, akademisë, gazetarisë dhe publicistikës i dha rëndësinë e veçantë këtij çmimi, duke përcaktuar edhe fituesit e 3 kupave. Tre çmimet e para të këtij konkursi u fituan: në poezi nga Nurije Embrullai, nga Maqedonia e Veriut, në kategorinë përkthim nga Myrteza Bode, nga Berati dhe në kategorinë ese nga Agron Tufa.

Për kryebashkiakun e Beratit, Ervin Demo, ky event që tashmë është kthyer në një traditë të përvitshme, është një nga eventet më të rëndësishme të organizuara në qytet, ku nga viti në vit numri i pjesëmarrësve po rritet.

Çmimi Letrar “Vexhi Buharaja” startoi 5-vjet më parë, në 99-vjetorin e lindjes së studiuesit e orientalistit të famshëm shqiptar Vexhi Buharaja dhe bashkia e qytetit vendosi ta zhvilloi këtë konkurs mbarëkombëtar çdo vit, si një risi dhe traditë për qytetin kulturor të Beratit.