LVV-ja kërkon shkarkimin e kryesuesit të Kuvendit të Prishtinës

Lëvizja Vetëvendosje nëpërmjet një konference për media ka kërkuar seancë të jashtëzakonshme të martën në Kuvendin Komunal të Prishtinës, duke kërkuar shkarkimin e kryesuesit, Pëllumb Bajqinovci nga Lidhja Demokratike e Kosovës.

Asamblistja Nora Kelmendi ka bërë thirrje për pjesëmarrje pa dallim në këtë seancë, të cilën e ka vlerësuar si mund për funksionalizim të Kuvendit.

“Lëvizja Vetëvendosje me përkrahje edhe të partive tjera opozitare, ka iniciuar kërkesë për një seancë të jashtëzakonshme me të vetmin pikë të rendit të pikës, shkarkimin e kryesuesit të Kuvendit Komunal”, ka thënë ajo.

Shefi i asamblistëve të VV-së, Gëzim Sveçla ka thënë se Kuvendi ka qenë i bllokuar dhe jo funksional tash e dy muaj.

“Siç e dini prej datës 8 shkurt, kur PDK bëri të ditur daljen nga koalicioni me LDK-në në Prishtinë të paktën zyrtarisht, nuk ka një shumicë qeverisëse. Kjo po shihet sa i përket drejtorive komunale, ku shumica e drejtorëve janë nga LDK, një subjekt që në zgjedhjet e fundit komunale në Prishtinë i kishte fituar jo më shumë se 26% të votave, sot ka 100% pushtet në ekzekutiv”, ka deklaruar ai, raporton RTK.

Asamblisti tjetër i kësaj partia, Mirsad Vitija, ka akuzuar PDK-në se po përpiqet që me një këmbë të rri në pushtet e me një këmbë në opozitë.